® Mərkəzi Gömrük Hospitalında skoliozun müasir üsullarla müalicəsi aparılır
Mərkəzi Gömrük Hospitalının Fizioterapiya şöbəsinin rəisi, fizioterapevt-reabilitoloq Səidə Kərimova “Həkim məsləhəti” rubrikasında “Skolioz necə müəyyən edilir?” mövzusunda məlumat verib.
Skoliozun erkən diaqnostikası çox vacibdir. Xəstəlik uşaqlarda sürətlə və gizlin inkişaf etdiyinə görə onun erkən müayinə olunması daha yaxşıdır. Bu, xəstəliyi effektiv nəzarətdə saxlamağa və əməliyyatsız müalicə etməyə imkan yaradır. Nəzərə almaq lazımdır ki, idiopatik skolioz erkən mərhələlərdə deformasiyadan başqa heç bir əlamətlə özünü büruzə vermir. Skoliozun yuxarı dərəcələrində və ciddi əzələ disbalanslarında ağrılar əmələ gələ bilər. Ona görə uşaqda onurğa ağrıları yaranan kimi mütləq fizioterapevt müayinəsinə aparılmalıdır.
Skoliozun müayinəsi fizikal vizual baxışdan başlayır. Müayinə zamanı bəzi nahiyələrə xüsusi diqqət yetirmək lazımdır. Bu, valideynlər üçün faydalı məlumatlardır. Beləliklə, pasiyentdə kürək və bel nahiyəsinin sağ və sol tərəfini simmetrik olub-olmaması qiymətləndirilir. Həmin nahiyədə bir sıra məqamlara: çiyinlərin səviyyəsinə və qabarmasına, bel xəttinin və çanağın simmetrik olmasına diqqət yetirilir. Müayinə zamanı həmin yerlərdə asimmetriyanın aşkar edilməsi skoliozun əlaməti ola bilər.
Sadə bir test olan Adams testi də aparıla bilər. Pasiyent qabağa əyilir və pasiyentin kürək və ya bel nahiyəsində qabarmanın olub-olmamasına diqqət yetirilir. Qabarmalar onurğada fəqərələrin rotasiyası hesabına əmələ gəlir. Fəqərələr öz oxu ətrafında fırlanır. Bunun baş verməsinin səbəbi hələ də tam aydın bilinmir.
Vizual müayinədən sonra pasiyent rentgenə göndərilir. Rentgen skoliozun dərəcəsini həkimə göstərir. Eyni zamanda, rentgendə sümüklərin bağlanma zonaları qiymətləndirilir.
Bölmənin digər xəbərləri
