® “PAŞA Qrup” şirkətləri şəhidlərimizin ailə üzvlərinin və müharibə əlillərinin təhsil xərclərini qarşılayır
“PAŞA Qrup” şirkətləri YAŞAT Fondu ilə birgə tərəfdaşlıq çərçivəsində şəhidlərimizin ailə üzvlərinin və müharibə əlillərinin təhsil xərclərini qarşılayır.
Belə ki, müvafiq kateqoriyadan olan şəxslərin ölkə daxilində və xaricində müxtəlif təhsil pillələri üzrə xərcləri “PAŞA Holdinq” və onun törəmə şirkətləri olan “PAŞA Sığorta” və “PAŞA Həyat” tərəfindən qarşılanacaq.
Sözügedən siyahıya ümumilikdə 282 şəxs daxildir ki, onların arasında həm yerli, həm də xarici təhsil ocaqlarında təhsil alanlar var. Xarici təhsil ocaqları arasında İzmir Katip Çelebi Universiteti, Ukrayna Dövlət Statistika Xidməti Milli Statistika, Mühasibat Uçotu və Audit Akademiyası, Kiyev Milli Texnologiyalar və Dizayn Universiteti, Moldova Respublikası Komrat Dövlət Universiteti və digər universitetlər yer alır, təhsil haqlarının ümumi məbləği isə 1,5 milyon manatdan çox vəsait təşkil edir.
Qeyd edək ki, artıq 2025-2026-cı illəri əhatə edən tədris illəri üzrə yerli təhsil müəssisələrində oxuyan şəxslərin ödənişləri tamamlanıb. İyun ayının sonunadək xarici təhsil müəssisələri üzrə də ödənişlərin tamamlanması nəzərdə tutulub.
Xatırladaq ki, şəhid ailələri, eləcə də qazilərə dəstəyin göstərilməsi “PAŞA Holdinq”in sosial məsuliyyət fəaliyyətində əks olunan əsas istiqamətlərdən biridir. Bu məqsədlə “PAŞA Holdinq” YAŞAT Fondu tərəfindən reallaşdırılan YAŞAT düşərgələrinin əsas tərəfdaşı olub.
Bundan əlavə, 2023-cü ildən etibarən “PAŞA Holdinq” tərəfindən 44 günlük Vətən müharibəsində şəhid olan qəhrəmanların 18 yaşadək olan övladları üçün sosial dəstək proqramı həyata keçirilir. Proqram çərçivəsində, Yeni il, Novruz Bayramı, Qurban Bayramı, Ramazan Bayramı və Zəfər Günü münasibətilə şəhid övladı olan ailələrə “PAŞA Holdinq” və “Bravo” supermarketlər şəbəkəsi tərəfindən bayram sovqatları təqdim olunur, “PAŞA Sığorta” tərəfindən sığorta xidmətləri göstərilir, eləcə də təhsil ləvazimatları təqdim olunur.
Bölmənin digər xəbərləri
