"Top Resa 2015" beynəlxalq turizm sərgisi sabah öz işinə başlayacaq
Bakı, 28 sentyabr, AZƏRTAC
Sentyabrın 29-dan oktyabrın 2-dək Parisdə keçiriləcək "Top Resa 2015" beynəlxalq turizm sərgisində ölkəmizi mədəniyyət və turizm nazirinin müavini Nazim Səmədovun rəhbərlik etdiyi nümayəndə heyəti təmsil edəcək.
Mədəniyyət və Turizm Nazirliyindən AZƏRTAC-a bildirilib ki, sərgidə 3 yerli turizm şirkəti- "Geo Travel", "Gilan Tourism" və "SW travel" təmsil olunacaq.
Adıçəkilən sərgidə respublikamızın turizm imkanlarını əks etdirən 34 kvadratmetrlik sahədə xüsusi lövhə quraşdırılıb. Lövhə sərgiyə gələn ziyarətçi və iştirakçılara paylanması üçün ingilis və fransız dillərində müxtəlif növ reklam-çap məhsulları ilə təmin olunub.
Mədəniyyət və Turizm Nazirliyi və yerli turizm şirkətləri artıq yeddinci dəfədir ki, "Top Resa" beynəlxalq turizm sərgisində iştirak edir. Ötən il adıçəkilən tədbirdə ölkəmizlə yanaşı, 159 ölkədən 1800-ə yaxın şirkət təmsil olunub.
Bölmənin digər xəbərləri
