AAKM “MOVİEMENTO“ KİNO EVİNƏ ETİRAZ MƏKTUBU GÖNDƏRMİŞDİR
Bakı, 16 iyun (AZƏRTAC). Almaniyadakı Azərbaycanlıların Koordinasiya Mərkəzi (AAKM) Berlindəki “Moviemento“ Kino Evinə etiraz məktubu göndərmişdir.
Diasporla İş üzrə Dövlət Komitəsinin mətbuat xidmətindən bildirmişlər ki, buna səbəb iyunun 3-dən 9-dək mühacir erməni rejissoru Don Askaryanın burada nümayiş etdirilmiş sənədli filmləri arasında “Dağlıq Qarabağ“ (Berg Karabach) adlı iftira və yalan üzərində qurulmuş filminin olmasıdır. Filmin iştirakçıları olan Qarabağ erməniləri Azərbaycana qarşı iftira və böhtanla çıxış edir, faktları saxtalaşdırırlar. Azərbaycanın Almaniyadakı səfirliyinin bu məsələ ilə bağlı təqdim etdiyi məlumatı araşdıran AAKM dərhal “Moviemento“ Kino Evinə məktub ünvanlayaraq reallığı və həqiqəti əks etdirməyən belə bir filmin nümayişinə kəskin etirazını bildirmiş, ermənilərin cinayətkar simasını Xocalı faciəsinə dair faktlarla açıqlamışdır.
AAKM-in məktubunda Qarabağ həqiqətlərinin azərbaycanlıların dilindən də dinlənilməsi və bu məzmunda çəkilmiş, Azərbaycanın haqlı mövqeyini əks etdirən filmlərin nümayiş olunması, eyni zamanda kino evinin rəhbərliyi ilə görüşün təşkili tələb edilir.
Bölmənin digər xəbərləri
