ABŞ GÜRCÜSTAN HƏRBÇİLƏRİNİN HAZIRLANMASINA YARDIM EDƏCƏK

20.09.2006 [22:48]
Çap et
A⁺ A^-

AZƏRTAC-ın xüsusi müxbiri xəbər verir ki, Tbilisidə Gürcüstanla ABŞ arasında “Sabitliyin saxlanılması əməliyyatı”nın ikinci mərhələsi ilə əlaqədar memorandum imzalanmışdır.

Memorandumu Gürcüstanda səfərdə olan ABŞ-ın Avropadakı silahlı qüvvələrinin komandanlığı rəhbərinin müavini, general Uilyam Uord və Gürcüstan Silahlı Qüvvələri Baş Qərargahının rəisi, polkovnik Levan Nikoleişvili imzalamışlar.

Nikoleişvili demişdir: “Memorandum gürcü hərbçilərinin hazırlanmasının 2-ci mərhələsinin başlanmasına şərait yaradacaqdır. Təlimlərin keçirilməsinə 40 milyon dollar ayrılmışdır. Təchizat məsələsini Gürcüstan boynuna götürmüşdür. Əvvəlki proqramda isə həm təlim, həm də təchizatla bağlı xərcləri ABŞ ayırmışdı. İndi isə imkanımız olduğuna görə təchizat məsələsini özümüz həll edəcəyik”.

Uord qeyd etmişdir ki, yeni sənəd Gürcüstan-ABŞ hərbi əməkdaşlığını daha da dərinləşdirəcəkdir.

Yeni yardım proqramı bir il üçün nəzərdə tutulmuşdur.