ABŞ-ın federal agentlikləri bazar günündən etibarən qismən bağlana bilər
Bakı, 30 sentyabr, AZƏRTAC
Cümə günü ABŞ Nümayəndələr Palatasındakı radikal Respublikaçılar öz liderlərinin hökuməti müvəqqəti maliyyələşdirmək üçün təklif etdiyi qanun layihəsini rədd edərək, federal agentliklərin bazar günündən etibarən qismən bağlanmasına səbəb olublar.
AZƏRTAC Reuters agentliyinə istinadla xəbər verir ki, 232 deputatın lehinə, 198-nin isə əleyhinə çıxdığı səsvermədə Nümayəndələr Palatasının hökumətin maliyyələşdirilməsini 30 gün uzadılacağı və bağlanmanın qarşısının alınacağı üzrə təklifi rədd edilib. Gözlənilirdi ki, bu qanun layihəsi Demokratların nəzarətində olan Senatdan keçmək şansı az olan Respublikaçıların prioritetləri olan xərcləri azaldacaq və immiqrasiyanı məhdudlaşdıracaq.
ABŞ iqtisadiyyatına mənfi təsir edəcək bu səsvermə nəticəsində milli parklar bağlanacaq, 4 milyona qədər federal işçinin maaşları gecikəcək və maliyyə nəzarətindən tutmuş elmi tədqiqatlara qədər bütün sahələrdə durğunluq baş verəcək. Səsvermədən sonra Nümayəndələr Palatasının spikeri Kevin Makkarti bildirib ki, palata hələ də demokratları özündən uzaqlaşdıran mühafizəkar siyasətlər olmadan maliyyələşmənin uzadılmasını qəbul edə bilər. Lakin o, bundan sonra nə olacağını deməkdən imtina edib. Bu gün axşam saatlarında palatanın təkrar səsvermə keçirəcəyi gözlənilir.
ABŞ Senatının da vaxtında hərəkətə keçəcəyi bəlli deyil. Palata şənbə günü günortadan sonra hökuməti noyabrın 17-dək maliyyələşdirəcək ikipartiyalı qanun layihəsini qəbul etməli idi, lakin prosessual maneələr yekun səsverməni çərşənbə axşamına qədər təxirə sala bilərdi.
ABŞ-ın maliyyə naziri Canet Yellen bununla bağlı bildirib ki, hökumətin bağlanması kiçik biznes və uşaqlar üçün proqramların dayanmasına səbəb olacaq və bu da ölkənin iqtisadi tərəqqisini "baltalayacaq" və əsas infrastruktur təkmilləşdirmələrini gecikdirəcək.
Bölmənin digər xəbərləri
