ABŞ-ın Meyn ştatında Xocalı soyqırımının 30-cu ildönümü ilə əlaqədar konfrans keçirilib
Bakı, 18 fevral, AZƏRTAC
ABŞ-ın Meyn ştatındakı Portland şəhərində Xocalı soyqırımının 30-cu ildönümü ilə əlaqədar “İnsanlığa qarşı cinayət” mövzusunda konfrans keçirilib.
Diasporla İş üzrə Dövlət Komitəsindən AZƏRTAC-a bildirilib ki, azərbaycanlı tələbə Rüstəm Əhmədovun təşəbbüsü və Meyn Azərbaycanlıları Cəmiyyətinin rəhbəri Tərlan Əhmədovun təşkilatçılığı ilə Cənubi Meyn Universitetində (University of Southern Maine) baş tutan konfransda ali təhsil məktəbinin professor-müəllim, tələbə heyəti və KİV təmsilçiləri iştirak ediblər.
Tədbirdə Xocalı soyqırımı və etnik təmizləmə siyasətinin bütün qurbanlarının əziz xatirəsi bir dəqiqəlik sükutla yad edilib.
Konfransı giriş sözü ilə Rüstəm Əhmədov və Tərlan Əhmədov açaraq, Azərbaycan tarixinin ən dəhşətli və faciəli səhifələrindən biri olan Xocalı soyqırımı haqqında geniş məlumat veriblər. Bildirilib ki, 1992-ci il fevralın 25-dən 26-na keçən gecə erməni silahlı birləşmələrinin törətdiyi Xocalı soyqırımı təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır cinayətlərdən biridir. Erməni silahlılarının vəhşiliyi nəticəsində Xocalıda günahsız insanlar, o cümlədən qadınlar, yaşlılar və körpələr xüsusi qəddarlıqla və amansızlıqla qətlə yetirilib. Onlar diri-diri yandırılıb, başları kəsilib, üzlərinin dərisi soyulub, körpə uşaqların gözləri çıxarılıb.
Tədbirdə əsas məruzəçi qismində amerikalı insan hüquqları müdafiəçisi, Karolina Sülh İnstitutunun icraçı direktoru və həmtəsisçisi Faizal Xan çıxış edib. O, Xocalı soyqırımını əsrin faciəsi adlandırıb, bu qanlı qətliamı XX əsrin ən dəhşətli və qəddarcasına törədilmiş Holokost soyqırımı, Ruanda, Darfur, Srebrenitsa, Birma müsəlmanların faciələri ilə müqayisə edib. Azərbaycanda olarkən Xocalı faciəsinin canlı şahidləri ilə görüşdüyünü söyləyən məruzəçi öz təəssüratlarını konfrans iştirakçıları ilə bölüşüb.
İnsan hüquqları müdafiəçisi Amerika və dünya ictimaiyyətini “Xocalıya ədalət!” beynəlxalq kampaniyasına qoşulmağa, Xocalı soyqırımı həqiqətlərinin dünyada tanıdılmasına çağırıb.
Məruzəçi ABŞ-ın rəsmi dairələrindən Xocalı faciəsini Azərbaycan xalqına qarşı soyqırımı aktı kimi tanımağı tələb edib.
Konfrans çərçivəsində Xocalı soyqırımını əks etdirən stend nümayiş etdirilib.
Bölmənin digər xəbərləri
