ABŞ-ın Nevada ştatı Azərbaycanla əlaqələrin dərinləşməsində maraqlıdır
Bakı, 4 aprel, AZƏRTAC
ABŞ-ın Nevada ştatı Azərbaycanla iqtisadi-ticari sahədə əməkdaşlığın dərinləşməsində maraqlıdır. Bu baxımdan Assambleya üzvlərindən və iş adamlarından ibarət nümayəndə heyətlərinin qarşılıqlı səfərləri əhəmiyyətli ola bilər.
Bu fikirləri ABŞ-ın Nevada Ştat Assambleyasının sədri Con Həmbrik Azərbaycanın xarici işlər naziri Elmar Məmmədyarovla görüşdə söyləyib.
Xarici İşlər Nazirliyinin mətbuat xidmətindən AZƏRTAC-a bildiriblər ki, Con Həmbrik ölkəmizə səfərindən və burada keçirdiyi görüşlərdən məmnun qaldığını qeyd edib.
Elmar Məmmədyarov ABŞ Prezidenti Barak Obamanın dəvəti ilə Azərbaycan Prezidenti İlham Əliyevin Vaşinqtonda keçirilmiş IV Nüvə Təhlükəsizliyi Sammitində iştirakı və Birləşmiş Ştatlardakı görüşləri haqqında danışaraq, səfərin ölkələrimiz arasında əməkdaşlıq əlaqələrinin daha da inkişaf etdirilməsinə mühüm töhfə verəcəyinə inandığını bildirib. O, dövlətlərarası əlaqələrin inkişafında parlament diplomatiyasının mühüm rolunu qeyd edib.
Nazir Azərbaycanın ABŞ-ın yerli ştatları ilə də əlaqələrin inkişafına böyük önəm verdiyini bildirərək, bu baxımdan Nevada ilə iqtisadi-ticarət sahəsində əməkdaşlığın genişləndirilməsində ölkəmizin maraqlı olduğunu diqqətə çatdırıb.
Görüşdə qarşılıqlı maraq kəsb edən regional və beynəlxalq məsələlər ətrafında fikir mübadiləsi aparılıb.
Bölmənin digər xəbərləri
