ADPU-nun Şamaxı filialında anım tədbiri: Ulu Öndər erası
Bakı, 13 dekabr, AZƏRTAC
Azərbaycan Dövlət Pedaqoji Universitetinin (ADPU) Şamaxı filialında Sosial və xüsusi elmlər kafedrası və Tələbə Gənclər Təşkilatının (TGT) birgə təşkilatçılığı ilə Ulu Öndər Heydər Əliyevin anım gününə həsr olunmuş “Ulu Öndər erası” adlı tədbir keçirilib.
AZƏRTAC xəbər verir ki, tədbirdən əvvəl xalqımızın Ümummilli Lideri Heydər Əliyevin və ölkəmizin suverenliyi, ərazi bütövlüyü uğrunda şəhid olan vətən övladlarının xatirəsini yad olunub və Azərbaycan Respublikasının Dövlət Himni səsləndirilib.
Filialın direktoru, dosent Tünzalə Yusifova çıxış edərək Ulu Öndərin həyat və fəaliyyətindən danışıb. Onun sözlərinə görə, tarixdə elə şəxsiyyətlər yetişib ki, onlara nəinki təmsil etdikləri xalqın taleyində, eləcə də dünya siyasətində olduqca böyük missiyanı həyata keçirmək nəsib olub. Ümummilli Lider Heydər Əliyev də məhz belə tarixi şəxsiyyət, dünya siyasətinin mahir bilicisi idi. Azərbaycanın müasir tarixinin böyük bir mərhələsi, eləcə də müstəqil dövlətimizin dinamik inkişafı və dünyaya inteqrasiya prosesi Heydər Əliyevin adı və fəaliyyəti ilə bağlıdır. Məhz Ulu Öndərin şərəfli xilaskarlıq missiyası nəticəsində məhv olmaq təhlükəsindən qurtulan Azərbaycan gələcəyə inamla addımlayan qüdrətli dövlətə çevrildi.
Vurğulanıb ki, Ümummilli Liderin siyasətini uğurla davam etdirən Müzəffər Ali Baş Komandan, Prezident İlham Əliyev onun məqsəd və amallarını gerçəkləşdirmək üçün quruculuq tədbirləri, islahatlar həyata keçirir. Ölkə rəhbərinin bu gün dünya miqyasında qazandığı böyük nüfuz, nəhəng dövlətlərin başçıları ilə bərabərhüquqlu tərəfdaş kimi danışıqlar aparması onu göstərir ki, Heydər Əliyevin dövlətçilik ideyaları yaşayır və zəfər çalır.
Daha sonra Heydər Əliyevin həyatı və ictimai-siyasi fəaliyyətinə həsr olunmuş çıxışlar dinlənilib, videoçarx nümayiş olunub.
Sonda “Heydər Əliyev İli” çərçivəsində keçirilən tədbirlərdə fəal iştirak etdiklərinə görə bir sıra tələbələr sertifikatla təltif olunub.
Bölmənin digər xəbərləri
