AEBA: Zaporojye AES yeddi aydır tək bir elektrik xətti üzərində işləyir
Bakı, 15 may, AZƏRTAC
Atom Enerjisi üzrə Beynəlxalq Agentlik (AEBA) Zaporojye Atom Elektrik Stansiyasının yeddi həftədən çoxdur ki, tək bir xarici ehtiyat elektrik xəttindən asılı olduğunu bildirib.
AZƏRTAC xəbər verir ki, AEBA Ukrayna və Rusiya Federasiyası ilə vacib təmir işləri üçün zəruri olan müvəqqəti, lokal atəşkəs barədə danışıqları davam etdirir.
Zaporojye AES-ə gedən əsas elektrik xətti olan “Dneprova” martın 24-də kəsilib. O vaxtdan bəri stansiya üç dəfə xaricdən elektrik enerjisini tamamilə itirib.
AEBA Ukraynada fəaliyyət göstərən üç nüvə elektrik stansiyasının - Xmelnitski, Rovno və Yujno-Ukrainskanın yaxınlığında, eləcə də Çernobıl zonasında hərbi fəaliyyətin əhəmiyyətli dərəcədə artdığını bildirir. Son 24 saat ərzində Agentliyin komandaları nüvə obyektlərinə yaxın ərazidə 160-dan çox dron uçuşu hadisəsi qeydə alıblar.
“Atom obyektləri yaxınlığında hər hansı bir hərbi fəaliyyət nüvə qəzası riskini əhəmiyyətli dərəcədə artırır”, - deyə AEBA-nın baş direktoru Rafael Qrossi vurğulayıb. O, bütün tərəfləri maksimum təmkin göstərməyə və nüvə təhlükəsizliyi və mühafizəsinin yeddi prinsipini tam şəkildə tətbiq etməyə çağırıb.
Zaporojye AES ətrafında vəziyyət son dərəcə qeyri-sabit olaraq qalır. Təhlükəsizlik təhdidləri səbəbindən əvvəlki uğursuz cəhddən sonra, bazar ertəsi günü AEBA komandası həftəlik təchizatı təmin etmək üçün yenidən Enerqodar şəhərinə çata bilməyib.
Agentliyin Çernobıl stansiyasındakı, eləcə də Xmelnitski və Rovno AES-lərdəki işçiləri çərşənbə axşamından cümə axşamına qədər məcburən sığınacaqda qalıblar. Cənubi Ukrayna AES-dəki bir komanda obyektin yaxınlığında hərbi fəaliyyətə işarə edən səslər barədə məlumat verib.
Bölmənin digər xəbərləri
