Ağalıda yenidən doğulan ümidlər – keçmiş məcburi köçkünlər AZƏRTAC-a danışırlar VİDEO
Zəngilan, 14 noyabr, Aydın Yavərzadə, AZƏRTAC
Bu gün Zəngilanın Ağalı kəndinə Böyük Qayıdış Proqramı çərçivəsində növbəti köç prosesi həyata keçirilib. İllərdir yurd həsrəti ilə yaşayan keçmiş məcburi köçkünlər Şanlı Zəfərin bəxş etdiyi sevincli günləri yaşayırlar. Həm Ağalının müasir görkəmi, həm də köçkünlərin ürək sözləri bu qayıdışın təkcə fiziki deyil, həm də mənəvi dirçəliş olduğunu göstərir.
AZƏRTAC-ın bölgə müxbiri Ağalıya qayıdan keçmiş məcburi köçkünlərlə görüşüb, onların təəssüratlarını özlərindən dinləyib.
“40 yaşımda 8 yaşlı Çinarənin saflığına döndüm”
Ağalıya qayıdan keçmiş məcburi köçkünlərdən biri Çinarə Firudinovadır. Deyir ki, illərin kədəri sevincə və qürura çevrilib: “Qəlbimizdə bir zamanlar yer tapmış ağrının yerini Şanlı Zəfərin işığı doldurub. Bu torpağın azadlığı uğrunda canını fəda edən şəhidlərimizə Allahdan rəhmət, qazilərimizə isə şəfa diləyirik. Onların mübarək qanı ilə azad edilən bu torpağa – Ana Vətənimizə yenidən qovuşduq. İndi hər daşı, hər qarışı bizə əmanətdir, bizə müqəddəsdir. Bütün Ağalı sakinləri adından, Zəfərimizin memarı, Müzəffər Ali Baş Komandanımız İlham Əliyevə sonsuz təşəkkürümüzü bildiririk”.
Ağalıdan ailəsi ilə birlikdə didərgin düşəndə səkkiz yaşında olduğunu vurğulayan Ç.Firudinova deyib: “Həsrətin yollarını qət edib, doğma diyara 40 yaşımda qayıtdım. Lakin kəndə qədəm qoyan kimi, illərin yükü çiyinlərimdən götürüldü, ruhum yenə o səkkiz yaşlı Çinarənin saflığına döndü. Gözlərimin önündə bir anda kəndimizin cığırları, məktəbimizin pillələri, gülüş səsi ilə dolu bağçamız və doğma evimizin isti ocağı canlandı.
Bu gün Ağalımız daha möhtəşəmdir! Köhnə xatirələrin üstündə sanki bir nağıl şəhəri ucalıb. Müasir, yaraşıqlı evlər inşa edilib, yeni məktəb və bağça tikilib, abad yollar çəkilib. Bu gün Ağalıda xoşbəxt günlərimiz yenidən başlayır”.
“Bu sevinc göz yaşları illərin həsrətinin sona çatdığını bildirir”
Digər Ağalı sakini Sona Əlizadə cəmi altıaylıq körpə ikən, ata-anasının qucağında bu torpaqlardan məcburi köçkün düşmüşdü. Zaman qanad açıb uçdu, uzun illərin həsrəti nəhayət sona çatdı... O, bu gün 32 yaşında öz övladları ilə müqəddəs bildiyi kəndinə - Ağalıya qayıdıb.
“Bütün bu illər ərzində doğma Zəngilanımız, əziz Ağalımız mənim üçün yalnız valideynlərimin nəql etdiyi rəvayət, xəyal qura biləcəyim bir təsəvvür idi. Atam və anam keçmişin hər bir xatirəsini mənə bir-bir anladaraq, gələcəyə olan əbədi ümidimi yaşatdılar. Mən hər zaman inanırdım, qəlbimin dərinliyində bilirdim ki, bir gün biz doğma ocağımıza dönəcəyik”, - deyir S.Əlizadə.
Bildirir ki, Ağalıya ilk sakinlərin köçü baş tutanda atası ilə bu yerlərə gəlib, kəndi öz gözləri ilə görüb: “O gün ürəyim titrədi, amma bu gün! Bu gün artıq öz övladlarımla bu torpaqlarda məskunlaşmaq üçün gəlmişəm. Sevincimin həddi-hüdudu yoxdur. İçimdə coşan bu hisslər sel kimi axır, onları ifadə etməyə sözlər kifayət etmir”.
“Mən ağlayaraq sevindim, çünki bu sevinc göz yaşları illərin həsrətinin sona çatdığını bildirir. Şükürlər olsun ki, biz artıq doğma kəndimizdəyik! Bu günlərə görə biz şəhidlərimizə borcluyuq. Allah şəhidlərimizə rəhmət eləsin, qazilərimizə şəfa versin. Onlar bizə bu qürurlu günləri bəxş etdi”, - deyən həmsöhbətim fikrini tamamlayır.
“Hər bir şəhidimiz həm də bizim əzizimiz, bizim övladımızdır”
Bu gün köç karvanı ilə Ağalıya köçən Zərifə Məhərrəmovanın kənarda durub bizi seyr etdiyinin fərqinə vardım. Onun da bu şad gündə deyiləsi sözləri var: “Gənc ailə idik. 1993-cü ilin oktyabrında, üç gün blokadada qaldıqdan sonra doğma ocağımızı tərk etdik. Həmin gün kəndimdən qəlbimdə min bir ağrı ilə, yanaqlarımdan süzülən kədər göz yaşları ilə ayrılmışdım. O zaman yola düşəndə, qucağımda üç körpə övladım vardı. Bu gün isə... Bu gün mən kəndimiz Ağalıya qayıdıram – illərin həsrəti bitib, kədər silinib! İndi yanaqlarımdan axanlar artıq sevinc göz yaşlarıdır. Ən əsası, mən bu müqəddəs yurda tək deyil, o körpə övladlarımın da böyüyüb boya-başa çatmış övladları ilə, nəvələrimlə birlikdə, üç nəsil olaraq qayıtmışam”.
Zərifə Məhərrəmova deyir ki, Azərbaycan kiçik dövlət olsa da, böyük nailiyyətə imza atdıq, əbədi yaşayacaq tarix yazdı: “Müzəffər Ali Baş Komandanımız İlham Əliyev başda olmaqla dövlətimlə, xalqımla qürur duyuram. Bizim cəsur xalqımız Ali Baş Komandanın “Dəmir yumruğu” altında birləşdi və Rəşadətli Ordumuzun Şanlı Qələbəsi bütün dünyaya səs saldı. Biz hər zaman birlikdə olmalı, azad edilən torpaqlarda qurub-yaratmalı, Vətən uğrunda canını verən şəhidlərimizin ruhu şad olsun deyə bu torpaqları çiçəkləndirməliyik. Mən bütün şəhid valideynlərinin qarşısında, şəhidlərimizin müqəddəs ruhu qarşısında baş əyirəm!”.
“Torpaqlarımız azad olunandan bəri qəlbimdə bir arzu var idi: Ağalıya qayıdanda evimdə ilk qazanı şəhidlərimizin adına asmaq! O müqəddəs gün gəlib çatdı. Başda şəhid generalımız Polad Həşimovun anası Səmayə ana olmaqla, bütün şəhid analarına səslənirəm: Hər bir şəhidimiz həm də bizim əzizimiz, bizim övladımızdır!”, - deyə o əlavə edib.
Qeyd edək ki, bu gün Ağalı kəndinə 41 ailə olmaqla 110 nəfər köçürülüb. Onlar respublikanın müxtəlif ərazilərində yataqxana, sanatoriya, düşərgə, yarımçıq tikililər və inzibati binalarda müvəqqəti məskunlaşmış ailələrdir.
Bölmənin digər xəbərləri
