AĞDAM RAYONUNDAKI “DÖRDYOL-1” QƏSƏBƏSİ İLƏ TANIŞLIQ
Dövlətimizin başçısı martın 1-də Ağdam rayonunun ərazisində yeni salınmış “Dördyol-1” qəsəbəsinə gəldi. Prezident İlham Əliyevi burada Baş nazirin müavini, Dövlətqaçqınkomun sədri Əli Həsənov, Komitənin işçiləri, inşaatçılar və məcburi köçkünlər səmimiyyətlə qarşıladılar.
Azərbaycan Prezidenti “Dördyol-1” qəsəbəsinin maketi və ümumiyyətlə, 2006-cı ildə burada istifadəyə verilməsi nəzərdə tutulan obyektlərin layihəsi, eləcə də salınacaq digər qəsəbələrin maketləri ilə tanış oldu. Baş nazirin müavini Əli Həsənov bildirdi ki, Ermənistanın hərbi təcavüzü nəticəsində didərgin düşmüş, çadır düşərgələrində və Bərdə rayonu ərazisində yük vaqonlarında müvəqqəti yerləşdirilmiş Ağdam və digər rayonlardan olan məcburi köçkünlərin sosial, mənzil-məişət vəziyyətinin yaxşılaşdırılması və məşğulluğunun təmin edilməsi tədbirləri haqqında Prezidentin 2004-cü il 4 fevral tarixli Sərəncamına uyğun olaraq, Məcburi Köçkünlərin Sosial İnkişaf Fondu tərəfindən Ağdam rayonunda 12 və Ağcabədi rayonunda 1 qəsəbənin tikintisi başa çatdırılmaqdadır. Yeni salınan qəsəbələrdə 3860 yaşayış evi, ümumi sahəsi 190 min 632 kvadratmetr olan sosial-texniki infrastruktur obyektləri tikiləcəkdir. Burada ümumiyyətlə, 2010 şagirdlik 15 məktəb binası, 175 yerlik 5 uşaq bağçası, 10 çarpayılıq xəstəxana, 9 ambulatoriya, feldşer, mama və tibb məntəqəsi, 1120 yerlik 8 klub, 7 poçt və rabitə şöbəsi, 10 inzibati bina tikilməsi, eləcə də 113,8 kilometr yol, 139,2 kilometr su xətti və 211,9 kilometrlik hava elektrik xətti çəkilməsi nəzərdə tutulmuşdur.
“Dördyol-1” qəsəbəsində 1160 ev tikilib və hazırda son tamamlama işləri aparılır. 13 qəsəbədə tikinti işləri başa çatdırıldıqdan sonra 3860 məcburi köçkün ailəsi təzə evlərə köçürüləcəkdir. Bu ailələrdən 149-u Kəlbəcər, 37-si Laçın rayonlarından, qalanı isə Ağdam rayonundan olan məcburi köçkünlərdir. 2006-cı ilin əvvəlinədək 674 ailə tikintisi başa çatmış dörd qəsəbəyə -“Bənövşələr”, “Bənövşələr-1”, “Alıbəyli-1”, “Alıbəyli-2” qəsəbələrinə köçürülmüşlər. Tam köçürülmə 2006-cı ilin birinci yarısında başa çatdırılacaqdır. Yeni salınan qəsəbələrdə inşaat işlərinə respublikanın 30-dan artıq şəhər və rayonundan təxminən 20 min nəfər cəlb olunmuşdur.
Prezident İlham Əliyev Ağdam rayonu ərazisində qəsəbələrin necə yerləşdirilməsi və elektrik enerjisi təchizatı məsələləri ilə maraqlandı, tikintidə çalışan mütəxəssislərlə, o cümlədən Türkiyədən olan inşaatçılarla görüşdü, onların işini yüksək qiymətləndirdi. Dövlətimizin başçısı yeni tikilmiş yaşayış evlərinə baxdı, buradakı şəraitlə maraqlandı. Azərbaycan Prezidenti bildirdi ki, tikinti şirkətləri yüksək keyfiyyətlə işləsələr, gələcəkdə onlara sifarişlərin həcmi daha da artacaqdır.
Bölmənin digər xəbərləri
