Ağdam Sənaye Parkı: Dayanıqlı məşğulluğun və sosial rifahın ünvanı VİDEO
Ağdam, 28 mart, AZƏRTAC
İşğal dövründə dağıdılaraq xarabalığa çevrilən Ağdam şəhəri bu gün yenidən qurulur, dirçəlir və ölkənin iqtisadi xəritəsində mühüm mərkəzlərdən birinə çevrilir. Həyata keçirilən genişmiqyaslı bərpa-quruculuq işləri ilə yanaşı, doğma yurdlarına qayıdan sakinlərin dayanıqlı məşğulluğunun təmin edilməsi də əsas prioritetlərdəndir. Bu baxımdan İqtisadi Zonaların İnkişafı Agentliyinin idarəetməsində olan Ağdam Sənaye Parkı həm iqtisadi inkişafın, həm də keçmiş məcburi köçkünlərin sosial rifahının təminində mühüm rol oynayır.
AZƏRTAC-ın bölgə müxbiri xəbər verir ki, rezidentlərinin sayına görə ölkənin ikinci ən böyük sənaye parkı olan Ağdam Sənaye Parkında 30 sahibkarlıq subyektinə rezidentlik, 5 sahibkara isə qeyri-rezidentlik statusu verilib. Sahibkarlar tərəfindən layihələrə 149,67 milyon manat investisiya yatırılıb, 13 müəssisə fəaliyyətə başlayıb, 1000-ə yaxın daimi iş yeri yaradılıb. Sənaye Parkında fəaliyyət göstərən müəssisələrdə yerli sakinlərin işlə təmin olunmasına xüsusi diqqət yetirilir. Xüsusilə doğma torpaqlarına qayıdan Ağdam sakinlərinin məşğulluğa cəlb olunması burada həyata keçirilən siyasətin əsas istiqamətlərindən biridir.
Ağdam Sənaye Parkında fəaliyyət göstərən “BAFCO İnvest” MMC-nin ayaqqabı fabrikində istehsal üzrə direktor müavini Musa Alızadə bildirib ki, hazırda müəssisədə 70-dən çox işçi çalışır və əməkdaşların böyük əksəriyyəti keçmiş məcburi köçkünlərdir: “Fabrikdə əməkdaşların 90 faizindən çoxu keçmiş məcburi köçkünlərdir. İşə qəbul zamanı dövlətimizin köç siyasətinə uyğun olaraq işğaldan azad olunmuş ərazilərdə yenidən qurulan kəndlərdən və Ağdam şəhərindən olan sakinlərə daha çox üstünlük veririk. İstehsal gücü artırıldıqca doğma yurda qayıtmış Ağdam sakinlərinin işə cəlb olunması daha da genişləndiriləcək”.
Sənaye parkında yaradılan iş yerləri yalnız iqtisadi deyil, sosial baxımdan da mühüm əhəmiyyət daşıyır. Ağdam sakinləri üçün doğma torpaqda yaşamaq və işləmək illərin həsrətindən sonra yeni bir həyatın başlanğıcı kimi qiymətləndirilir.
Fabrikdə mütəxəssis kimi çalışan Şəmistan Rüstəmov doğma şəhərində yaşayıb işləməyin sevincini bölüşərək deyib: “İki ilə yaxındır ki, burada çalışıram. Eyni zamanda, dədə-baba yurdumuz olan Ağdam şəhərinə köçmüşük. Doğma torpağımızda yaşadığım və işlədiyim üçün xoşbəxtəm. Əvvəllər Ağdam haqqında eşidirdik, indi isə burada yaşayırıq, işləyirik, karyera qururuq”.
Ağdama qayıdan sakinlər üçün yaradılan şərait onların sosial rifahına da müsbət təsir göstərir. Kəngərli kənd sakini Günay Məmmədova diqqətə çatdırıb ki, dövlət tərəfindən həm yaşayış, həm də məşğulluq məsələləri diqqətdə saxlanılır: “May ayında doğma yurdumuza köçmüşük. Dövlətimiz bizi burada işlə təmin edib. Çox sevinirəm ki, həm evlə, həm də işlə təmin olunmuşam. Hər şeydən məmnunam”.
Beləliklə, Ağdam Sənaye Parkı bu gün yalnız istehsal məkanı deyil, həm də qayıdışın sosial-iqtisadi dayaqlarından biri kimi çıxış edir. Burada yaradılan hər bir iş yeri doğma torpaqlara qayıdan insanlar üçün sabit gəlir və gələcəyə inam deməkdir.
Sürətlə inkişaf edən sənaye zonası yaxın illərdə daha çox müəssisənin fəaliyyətə başlaması ilə regionun iqtisadi potensialını daha da artıracaq. Sənaye müəssisələrində yeni iş yerlərinin açılması isə öz növbəsində Böyük Qayıdış prosesinə əlavə təkan verəcək.
Müxbir – Tahir Ağaməmmədov
Bölmənin digər xəbərləri
