Aİ-yə ixrac olunarkən "karbon vergisi"nə cəlb edilən Azərbaycan məhsullarının həcmi açıqlanıb
Bakı, 29 oktyabr, AZƏRTAC
Dünya Bankının və Beynəlxalq Valyuta Fondunun verdiyi məlumata görə, son 10 ildə baş vermiş iqlim dəyişiklikləri nəticəsində baş vermiş fəlakətlər nəticəsində dünya üzrə ÜDM-də 1,3 faiz itki qeydə alınıb.
AZƏRTAC xəbər verir ki, bu sözləri İqtisadiyyat Nazirliyi yanında Dövlət Vergi Xidmətinin rəisinin müavini Samirə Musayeva 13-cü Beynəlxalq “Caspian Energy Forum”da çıxışı zamanı deyib.
O qeyd edib ki, iqlim dəyişikliklərinin fəsadları və yaxud da atmosferə atılan istixana qazları dünya və bəşəriyyət üçün fəsadlar törətməklə yanaşı, iqtisadi resursların da qeyri-səmərəli şəkildə istifadəsinə səbəb olur.
“Bu da ölkələrin iqtisadi və ərzaq təhlükəsizliyinə, sənayenin uzunmüddətli dayanıqlı inkişafına ciddi təhdidlər yaradır. Azərbaycan COP29-a ev sahibliyi etmiş ölkə kimi yaşıl iqtisadiyyat, yaşıl enerji mövzularında marağını qlobal ictimaiyyətə çatdırmış ölkədir. Bizim üçün bu mövzu yalnız COP-a ev sahibliyi etmiş il çərçivəsində aktual deyil, bütövlükdə orta müddətli dövrdə ölkənin həm də iqtisadi inkişaf prioritetləri müəyyənləşdirilərkən yaşıl iqtisadiyyata keçid və bu zaman sahibkarın enerji səmərəliliyi diqqətə alınır”, - deyə rəis müavini vurğulayıb.
Samirə Musayeva onu da əlavə edib ki, Azərbaycandan "karbon vergisi"nə cəlb olunan məhsulların Avropa İttifaqına ixracının həcmi 0,4 faizdir. O bildirib ki, gələn il yanvarın 1-dən Avropa İttifaqı tərəfindən elan olunmuş sərhəddə karbon ticarət tənzimlənməsi işə düşəcək: “Yəni Avropa İttifaqına idxal olunacaq bir sıra məhsullara - 6 qrup məhsula istehsal olduğu ölkədə istehsal zamanı emissiya olunan karbon vahidlərinə hər hansı bir karbon qiymətinin tətbiq olunub-olunmamasından asılı olaraq, sərhəddə karbon qiymətləri tətbiq olunacaq. Biz də təbii ki, yerli biznesin bu cür təsirlərdən qorunması üçün İqtisadiyyat Nazirliyində işçi qrupu yaratmışıq. Bununla da Avropa İttifaqına ixrac zamanı tətbiq olunan qiymət siyasətinin yerli biznesin rəqabət qabiliyyətinə təsir edilməsinin ölçülməsi istiqamətində aidiyyəti işlər aparılır”.
Bölmənin digər xəbərləri
