Bakı, 18 dekabr, AZƏRTAC 

Aleksander Elbon - Formula 1 çempionatının gələn mövsümündə mübarizəyə qoşulacaq üç debütantdan biridir. Tailandlı yürüşçü “Toro Rosso” komandasında Daniil Kvyatla birgə çıxış edəcək. İtaliya komandasında Elbonun özü üçün seçdiyi nömrəni təsdiqləyiblər.

AZƏRTAC xəbər verir ki, 2014-cü ildən başlayaraq çempionatda debüt edən hər bir yürüşçü 2-dən 99-dək hər hansı rəqəmi seçərək, Formula 1 yarışlarında karyerasının sonunadək bu nömrə altında mübarizə aparmalıdır.

Aleksander “23” nömrəsini seçib. Maraqlıdır ki, 2013-cü ildən indiyədək bu nömrədən heç kim istifadə etməyib, sonuncu dəfə Maks Çilton yarışlarda “23” nömrəsi altında çıxış edib.