Almaniyada quraqlıq kənd təsərrüfatına ciddi zərbə vurub
Berlin, 18 avqust, AZƏRTAC
Almaniyada uzunmüddətli istilər və quraqlıq kənd təsərrüfatında məhsuldarlığın kəskin azalmasına səbəb olub.
AZƏRTAC yerli mediaya istinadla bildirir ki, Alman Fermerlər Assosiasiyasının 2026-cı il üzrə yekun hesabatında ölkədə taxıl istehsalının 41,9 milyon ton təşkil etdiyi və bu göstəricinin ötən illə müqayisədə 7 faiz az olduğu qeyd edilib. Taxıl növləri üzrə hektardan orta məhsuldarlıq 9 faiz azalaraq 68,9 sentnerə düşüb. Ən mühüm bitki sayılan qış buğdasının istehsalı 20,9 milyon ton olub, məhsuldarlıq isə 9 faiz azalaraq hər hektara 72,1 sentner təşkil edib. Ən böyük geriləmə qışlıq rapsda qeydə alınıb, bu növ üzrə məhsuldarlıq 20 faiz azalaraq hektardan 29,1 sentnerə, ümumi istehsal isə 3,3 milyon tona düşüb.
İsti və quraqlıqla yanaşı, zərərvericilər də itkilərin artmasına təsir edib. Qış arpasında istehsal 9,5 milyon tonla əvvəlki ilin səviyyəsində qalsa da, hektar başına məhsuldarlıq 4 faiz azalıb.
Xüsusilə Almaniyanın cənub və qərbində vəziyyət daha kritikdir. Fermerlər hökumətdən təcili yardım paketi, gübrə subsidiyalarının artırılmasını, birbaşa ödənişlərin 80 faizinin oktyabrda qabaqcadan verilməsini və dizel vergisinin azaldılmasını tələb edirlər.
Bölmənin digər xəbərləri
