Almaniyada sərhəd yoxlamaları nəticəsində 13 min nəfərin ölkəyə qanunsuz giriş cəhdinin qarşısı alınıb
Berlin, 5 fevral, AZƏRTAC
Almaniyanın bütün quru sərhədlərində ötən il sentyabrın 16-dan tətbiq edilən yoxlamalar çərçivəsində ölkəyə icazəsiz daxil olmağa cəhd göstərən 13 mindən çox şəxs müəyyənləşdirilərək geri qaytarılıb.
AZƏRTAC xəbər verir ki, bu barədə sərhədlərdə yoxlamalardan məsul olan Federal Polis Təşkilatının məlumatında bildirilib.
Son 140 gündə ümumilikdə 22 min 243 nəfər quru sərhədlərindən Almaniyaya icazəsiz daxil olmağa cəhd edib. Onlardan 13 min 786-sının lazımi sənədləri olmadığına görə ölkəyə girişinə icazə verilməyib. Sərhəd yoxlamaları nəticəsində, həmçinin 518 nəfər insan qaçaqçısı da saxlanılıb. Eləcə də barələrində axtarış və həbs qərarı olan 3306 nəfər müəyyən edilib.
Bu ilin yanvar ayında ölkəyə icazəsiz giriş cəhdlərində ötən ilin müvafiq dövrü ilə müqayisədə azalma qeydə alınıb. Belə ki, yanvarda 5147 nəfər ölkəyə icazəsiz giriş edib. Bu rəqəm ötən ilin yanvarında 6906 olub.
Xatırladaq ki, Almaniyanın daxili işlər naziri Nensi Fezerin qərarı ilə ötən il sentyabrın 16-dan etibarən Fransa, Lüksemburq, Belçika, Danimarka və Niderland ilə sərhədlərdə yoxlamaların aparılmasına başlanılıb. Polşa, Çexiya və İsveçrə ilə sərhədlərdə 2023-cü ilin oktyabrından, Avstriya ilə sərhəddə isə 2015-ci ildən yoxlamalar aparılır.
AZƏRTAC-ın xüsusi müxbiri
Berlin
Bölmənin digər xəbərləri
