ALMANIYADA YAŞAYAN SOYDAŞIMIZ YUSİF MƏMMƏDƏLİYEV ADINA MÜKAFATA LAYİQ GÖRÜLMÜŞDÜR
Bakı, 3 mart (AZƏRTAC). Diasporla İş üzrə Dövlət Komitəsinin mətbuat xidmətindən bildirmişlər ki, “Bilik” Maarifçilik Cəmiyyətinin təsis etdiyi Yusif Məmmədəliyev adına mükafatın builki sahibləri arasında Almaniyada yaşayan soydaşımız, Köln Konservatoriyasının professoru, Vaqner mükafatı laureatı Elnarə İsmayılova da vardır.
Mahir piano ifaçılığı, yüksək intellektual səviyyəsi ilə Azərbaycanı Avropada layiqincə təmsil edən E.İsmayılovanın maraqlı və zəngin həyat yolu vardır. E.İsmayılova hələ uşaqlıq və məktəb illərindən həyatın müxtəlif gözəlliklərini duya, onlara valeh ola bilirdi, amma ən yüksək zövqü yalnız musiqidən, saatlarla fortepiano arxasında əyləşib məşq etməkdən alırdı. Həyatının heç bir anı, ətrafındakı bütün maraqlı və sürətlə biri-birini əvəzləyən yeniliklər, dəyişikliklər onun musiqiyə olan sevgisini söndürməmiş, həvəsinin yönünü dəyişməmişdir.
E.İsmayılova musiqi xəzinəmizin layiqli təmsilçisi olmaq arzusunu gerçəkləşdirmişdir. Əvvəlcə Bakı Musiqi Akademiyası nəzdində Bülbül adına orta ixtisas musiqi məktəbinin fortepiano sinfini, sonra isə Üzeyir Hacibəyli adına Musiqi Akademiyasını bitirmişdir. Tələbəlik illərində E.İsmayılovanın nümayiş etdirdiyi özünəməxsus ifa tərzi, dərin musiqi duyumu, virtuoz ifaçılıq qabiliyyəti onun peşəkar gələcəyinin parlaqlığından xəbər verirdi. Gənc pianoçunun sənətinə sonsuz məhəbbəti, peşəkarlığını daha da inkişaf etdirmək üçün göstərdiyi səylər onu Azərbaycandan uzaqlara aparmışdır. Onun xaricə ilk səfəri klassik musiqinin beşiyi olan Almaniyaya - Baxın, Haydnın, Bethovenin vətəninə olmuşdur. E.İsmayılovanın buradakı ilk çıxışı Almaniyanın aparıcı musiqi xadimlərini və geniş dinləyici auditoriyasını valeh etmişdir.
Uzaq Azərbaycandan gəlmiş gənc pianoçunun professionallıq və özünəməxsus duyum üslubu ilə Avropa musiqisini bacarıqla ifa etməsi tələbkar musiqi ictimaiyyətinin diqqətindən yayınmamışdır. Tezliklə Elnarə İsmayılova yaradıcılığını davam etdirmək üçün Almaniyadan təklif almışdır. Bunu Azərbaycanın zəngin musiqi mədəniyyətini xaricdə təbliğ etmək şansı kimi dəyərləndirən E.İsmayılova təklifi qəbul etmiş və gənc soydaşımız qısa müddətdə Almaniyanın musiqi həyatına qaynayıb qarışmış, onun məhsuldar və uğurlu konsert fəaliyyəti başlanmışdır.
E.İsmayılova tezliklə qonşu Avstriyanın Zaltsburq şəhərindəki Motsart Musiqi Akademiyasında, sonra İspaniyanın Madrid Universitetində solo konsertlərlə, İsveçrədə isə dünya şöhrətli opera ulduzları ilə çıxış etməyə dəvət olunmuşdur.
E.İsmayılova konsert proqramları ilə yanaşı, biliyini və ifaçılıq ustalığını daha da təkmilləşdirmək məqsədi ilə Almaniyanın iki nüfuzlu musiqi təhsil ocağında təhsilini davam etdirmişdir. O, Köln və Essen musiqi akademiyalarının aspirantura bölmələrini fərqlənmə diplomları ilə bitirmiş, ölməz bəstəkar Bethovenin vətəni Bonn şəhərində keçirilən piano ifaçılığı müsabiqəsinin qalibi olmuşdur. Bundan sonra o, Almaniyanın Bayroyt şəhərində görkəmli bəstəkar və pianoçu Ferents Listin əsərlərinin ən parlaq və özünəməxsus fərqliliklə ifa və interpretasiyasına görə Rixard Vaqner mükafatına layiq görülmüşdür.
Qürur hissi ilə demək lazımdır ki, E.İsmayılova bu mukafata layiq görülmüş ilk azərbaycanlı musiqiçidir. O, həmçinin Almaniya-Avstriya Mədəniyyət və Musiqi Cəmiyyətinin fəxri üzvüdür. İlbəil yaradıcılığını, ifaçılıq üslubunu təkmilləşdirən, biliyini artıran E.İsmayılovanın Almaniyada 5 diski buraxılmışdır. Bura Bethoven, Brams, Şubert, Raxmaninov, Prokofyev və digər dahi bəstəkarların əsərləri daxil edilmişdir.
E.İsmayılova Almaniyada yalnız ifaçılıqla məşğul olmur. O, pedaqoji fəaliyyətini uğurla davam etdirir. Essen və Köln şəhərlərinin musiqi akademiyalarının dosentidir. Bundan əlavə, İsveçrənin Engelberg şəhərində onun fortepiano ustadlığı kursu uğurla keçir. E.İsmayılova öz sənətkar uğurlarını həmvətənləri ilə də ürəkdən bölüşərək, yardımını son illərdə Avropaya, o cümlədən Almaniyaya təhsil almağa gələn azərbaycanlı tələbələrdən də əsirgəmir, onlara həm tədris və yaradıcılıq işlərində, həm də sosial problemlərin həllində dəstək verir.
E.İsmayılova harada çıxış etməsindən asılı olmayaraq dünya bəstəkarlarının əsərləri ilə yanaşı, doğma Azərbaycan bəstəkarlarının əsərlərini özünun və tələbələrinin repertuarına daxil edir. Bu mövzuda söhbət düşəndə deyir:
- Üzeyir Hacıbəylinin, Qara Qarayevin, Fikrət Əmirovun, Cövdət Hacıyevin, Tofiq Quliyevin, Arif Məlikovun, Musa Mirzəyevin, Firəngiz Əlizadənin, Sevda İbrahimovanın və digər Azərbaycan bəstəkarlarının əsərlərini dünya konsert salonlarında səsləndirmək qəlbimdə sonsuz fərəh hissi doğurur. Sevindirici haldır ki, Azərbaycanın Almaniyadakı səfirliyi də bu gün Azərbaycan dövlətinin siyasətinə uyğun olaraq xaricdə yaşayan, uzun illər incəsənətimizi təbliğ edən, yaşadan sənətkarlara böyük diqqət göstərir, onların yaradıcılıq yolunu maraqla izləyir, müxtəlif tədbirlərə cəlb edir.
Soydaşımız E.İsmayılova nəinki Azərbaycanın Almaniyadakı səfirliyinin təşəbbüsü ilə reallaşdırılan tədbirlərdə, həmçinin bu ölkədə keçirilən beynəlxalq festivallarda və ya böyük yaradıcılıq gecələrində hər zaman Azərbaycan musiqisini ifa edir.
Doğma Azərbaycanın musiqi mədəniyyətini uzaq ellərdə layiqincə təbliğ edən E.İsmayılova Vətən üçün darıxanda bəstəkarlarımızın əsərlərini, xalq mahnılarımızı ifa etməklə doğma el-obası ilə “təmasa girir”, mənəvi zənginliyini daha da dərinləşdirir. O, həmişə deyir: “Mənim üçün Vətəni sevmək, onun adını ucaltmaq, yaradıcılığımda dünya klassikləri ilə yanaşı, Azərbaycanın görkəmli bəstəkarlarının əsərlərini ifa etmək, musiqinin dili ilə Azərbaycan diyarını, onun zərif duyumlu, sülhsevər düşüncəli insanlarını yada salmaq və özümü onların arasında hiss etməkdir”.
Bölmənin digər xəbərləri
