Almaniyanın Barleben şəhərində Ulu Öndər Heydər Əliyevin xatirəsinə həsr edilmiş idman festivalı VİDEO
Berlin, 10 may, AZƏRTAC
Heydər Əliyev adına Dünya Boks Komitəsinin və Diaspor Boks Liqasının birgə təşkilatçılığı, Diasporla İş üzrə Dövlət Komitəsinin dəstəyi ilə Almaniyanın Barleben şəhərində Ümummilli Lider Heydər Əliyevin anadan olmasının 103-cü ildönümünə həsr edilmiş idman festivalı keçirilib.
AZƏRTAC xəbər verir ki, festival Almaniyanın Maqdeburq şəhərindən və ətraf bölgələrindən gəlmiş sakinlərə əsl bayram ovqatı yaşadıb. Günboyu davam edən tədbirdə uşaqlar üçün qurulan attraksionlar, əyləncəli oyunlar və interaktiv proqramlar böyük maraqla qarşılanıb. Musiqi sədaları altında təşkil olunan rəqs proqramları isə festival iştirakçılarına xoş anlar bəxş edib. Ailələrin birlikdə vaxt keçirməsi, uşaqların sevinc dolu anları və tədbirdə hökm sürən səmimi atmosfer festivalın yadda qalan məqamlarından olub. Tədbirin əsas məramını Ulu Öndər Heydər Əliyevin uşaqlara, gənclərə və ailə dəyərlərinə verdiyi yüksək önəmin təbliği təşkil edib. Festival boyunca həm əyləncə, həm də idman elementlərinin vəhdəti iştirakçılar tərəfindən xüsusi rəğbətlə qarşılanıb.
Heydər Əliyev adına Dünya Boks Komitəsinin və Diaspor Boks Liqasının rəhbəri Yaşar Niftəliyev media nümayəndələrinə müsahibəsində yüksək təşkilatçılıq səviyyəsi ilə seçilən festivalın əsas məqsədinin Ümummilli Lider Heydər Əliyevin uşaqlara və gənclərə göstərdiyi diqqət və qayğını yaşatmaq, onların sağlam həyat tərzinə marağını artırmaq olduğunu vurğulayaraq deyib: “Biz Ulu Öndər Heydər Əliyevin xatirəsinə həsr olunan bu festivalı hər il keçiririk. Belə böyük festivalı təşkil etmək təcrübəmiz ildən-ilə artır. Ən vacib məsələ odur ki, bu festival Azərbaycanın və Ulu Öndər Heydər Əliyevin adı ilə bağlıdır. Festivalda təhlükəsizlik məsələsi xüsusilə diqqət mərkəzində saxlanılıb. Biz burada təhlükəsizliyi ən yüksək səviyyədə qoruyuruq. Çünki bu tədbir uşaqların sevincinə səbəb olur, onlar festivalda əylənirlər. Biz də bu cür tədbirləri keçirməklə dahilərimizin xatirəsini yad edirik”.
Festivalda idmanın bir sıra, o cümlədən boks üzrə yarışların da təşkil olunduğunu deyən Yaşar Niftəliyev bildirib: “Bütün bunlar burada yaşayan azərbaycanlıların alman cəmiyyətinə inteqrasiyasına və lobbiçilik fəaliyyətinə böyük təsir göstərir. Biz bu festivalı davam etdirəcəyik, onun miqyasını ildən-ilə genişləndiririk. Bilirsiniz, idman insanları bir-birinə yaxınlaşdıran, böyük təbliğat imkanına malik idman növüdür. Biz də idmanın bu imkanlarından səmərəli istifadə etməkdə davam edəcəyik”.
Qeyd edək ki, festival çərçivəsində keçirilən boks turnirində müxtəlif ölkələrdən olan idmançılar mübarizə aparıblar. Yarışlar tamaşaçıların böyük marağına səbəb olub. Gərgin idman mübarizəsi şəraitində keçən turnirin qaliblərinə medal və kuboklar təqdim edilib.
Boks turnirinin hakimi Rolf Kunş bu barədə deyib: “Bu gün Maqdeburq yaxınlığındakı Barlebendə Azərbaycanın Ümummilli Lideri Heydər Əliyevin xatirəsinə həsr olunan boks turniri keçirilir. Proqramda səkkiz döyüş var. Həyəcanverici qarşılaşmalar olacaq. Medallar və kuboklar uğrunda gərgin mübarizə gedir. Bütün iştirakçılara uğurlar arzulayıram. Heydər Əliyevin xatirə turnirinin hər il burada keçirilməsi ənənəyə çevrilib”.
Maqdeburq şəhər şurasının üzvü Bernd Heyneman da tədbir barədə açıqlamasında deyib: “Bu gün müasir Azərbaycan dövlətinin qurucusu Heydər Əliyevin anadan olmasının 103-cü ildönümü münasibətilə boks turnirinin keçirilməsindən məmnunam. Heydər Əliyev adına Dünya Boks Komitəsinin və Diaspor Boks Liqasının birgə təşkilatçılığı ilə bu illər ərzində bir çox turnirlər keçirilib. Bu turnirlər həmişə çox maraqlı olub, biz Bakıda da olmuşuq və bu gün isə Barlebendəyik. Bu gün burada çoxlu boksçunun mübarizə aparmasına görə məmnunam və ümid edirəm ki, maraqlı qarşılaşmalar olacaq, tamaşaçılar razı qalacaqlar”.
Xatırladaq ki, Heydər Əliyev adına Dünya Boks Komitəsi 2012-ci ildə yaradılıb və beynəlxalq səviyyədə fəaliyyət göstərir. Komitə tərəfindən Ulu Öndər Heydər Əliyevin adını daşıyan dünya kəmərləri təsis olunub və müxtəlif ölkələrdən peşəkar boksçular həmin kəmərlər uğrunda mübarizə aparırlar.
Beləliklə, Ümummilli Lider Heydər Əliyevin uşaqlara və gənclərə göstərdiyi xüsusi diqqət, sağlam və vətənpərvər nəslin formalaşdırılması ilə bağlı ideyaları festivalın ümumi ruhunda aydın şəkildə hiss olunub. İdman, əyləncə və ailə dəyərlərini bir araya gətirən tədbir Ulu Öndərin zəngin irsinin və gənc nəslə yönəlmiş humanist yanaşmasının yaşadıldığını bir daha nümayiş etdirib.
Bölmənin digər xəbərləri
