Almaniyanın Eurasianews portalı 20 Yanvar faciəsi haqqında məqalə yayıb
Berlin, 5 mart, AZƏRTAC
Almaniyanın Eurasianews xəbər portalı Azərbaycanın bu ölkədəki səfiri Pərviz Şahbazovun və ARDNŞ-in Almaniya nümayəndəliyinin dəstəyi ilə 20 Yanvar hadisələrinin 25-ci ildönümü ilə əlaqədar Berlində, Alman Məmurlar İttifaqı Forumunun binasında keçirilən tədbir haqqında məqalə yayıb (http://eurasianews.de/aserbaidschans-botschafter-wuerdigt-die-opfer-des-schwarzen-januars/). Məqalədə qeyd edilir ki, “Qara Yanvar” Azərbaycan tarixinə bir tərəfdən milli anım və matəm günü kimi, digər tərəfdən dövlət müstəqilliyinin və suverenliyin yenidən əldə olunmasına gətirib çıxaran xalq hərəkatı günü kimi düşüb.
Bildirilir ki, yanvarın 19-dan 20-nə keçən gecə Bakıda dinc nümayişçilərə qarşı sovet ordusunun keçirdiyi qanlı əməliyyat Sovet İttifaqının son dövrünün necə qarışıq və ziddiyyətli olduğunu göstərdi.
Sovet rəhbərliyinin müstəqilliyə can atan sovet respublikalarında gördüyü tədbirlər təxribatçı aksiyalarla və zorakılıqla səciyyələnirdi.
Azərbaycan xüsusi təcavüzə məruz qalan respublikalardan biri idi.
Məqalədə qeyd edilir ki, səfir P.Şahbazov çıxışında regionda ilk dəfə 1988-ci ildən bəri başlanan siyasi iğtişaşlar haqqında danışıb. Bu iğtişaşlar əsasən Dağlıq Qarabağda erməni ekstremistləri tərəfindən həyata keçirilirdi. Məqsəd Azərbaycan və Ermənistan növbəti illərdə Sovet İttifaqından ayrılandan sonra Azərbaycandan ərazi qoparmaq idi.
Mərkəzi sovet hakimiyyətinin bu ultra millətçi və separatçı terror qruplarına rəğbəti açıq görünürdü. “Parçala və hökmranlıq et” prinsipi ilə sovet rəhbərliyi bu hadisələrin respublikaların müstəqilliyə can atmalarına mənfi təsir göstərəcəyinə ümid edirdi. Artıq o zamanlar mərkəzi sovet hakimiyyəti respublikalar üzərində nəzarəti itirmişdi.
1988-ci ildən Dağlıq Qarabağdakı erməni millətçiləri müstəqillik elan edərək orada yaşayan azərbaycanlılara qarşı qırğınlara başladılar. Nəticədə 250 mindən çox azərbaycanlı öz evindən didərgin salındı. Sovet İttifaqı bu hücumların qarşısının alınması üçün hər hansı tədbir görmədiyindən Bakıda bir milyondan çox insanın iştirakı ilə kütləvi nümayişlər başladı.
1990-cı il yanvarın 19-da Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun razılığı ilə Bakıya qoşun göndərildi. Yanvarın 19-dan 20-nə keçən gecə qırmızı ordu tanklar və ağır artilleriya ilə şəhərə hücum edərək silahsız nümayişçilərə atəş açdı. Bakıdakı hərbi əməliyyatda 50 mindən çox əsgər iştirak edirdi. 147 vətəndaş güllə yaralarından və ya tank altında qalaraq həlak oldu. 744 insan yaralandı, 800 nəfər həbs olundu. Sovet respublikaları arasında öz müstəqilliyi uğrunda ən çox qurban vermiş Azərbaycan üçün bu qətliam bundan sonra yalnız suverenlik naminə mübarizədə bir stimul idi. Həmin vaxt Moskvada yaşayan Heydər Əliyev 1990-cı il yanvarın 21-də bu şəhərdə keçirdiyi mətbuat konfransında Azərbaycan vətəndaşlarına qarşı törədilən amansızlığı qətiyyətlə pisləyib. 1991-ci ildə Azərbaycan müstəqilliyini bərpa etdi. Hazırda Azərbaycan sürətlə inkişaf edən ölkələr sırasındadır, amma Dağlıq Qarabağın beynəlxalq hüquqa zidd işğalı davam edir.
Məqalədə Azərbaycan torpaqlarının işğalını əks etdirən xəritə də yer alıb.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
