Almaxanım Əhmədli: Artıq öz repertuarımı formalaşdırmışam – MÜSAHİBƏ
Bakı, 25 iyul, Fidan Əlizadə, AZƏRTAC
Müsahibimiz VI “Muğam” Televiziya Müsabiqəsinin Qran-Pri mükafatının sahibi, istedadlı müğənni Almaxanım Əhmədlidir. Gənc ifaçı uğura gedən yol barəsində düşüncələrini AZƏRTAC-la bölüşüb.
- İstərdik sənətdə atdığınız ilk addımlarınızdan söhbət açasınız, musiqi təhsiliniz necə başlayıb?
- Ziyalı ailəsində dünyaya gəlmişəm. Musiqiyə maraq da elə buradan başlayır. Atam ədəbiyyatşünas-alim, şair, filologiya elmləri doktoru, professor olmaqla yanaşı, həm də musiqiyə çox bağlı bir şəxsdir. Bu səbəbdən kiçik yaşlarımdan xalq, bəstəkar mahnılarını, muğamları oxumağa böyük marağım olub. Valideynlərim istedadımı kəşf etdikdən sonra, məni 9 yaşımdan etibarən bu istiqamətə yönəltdilər. Nəticədə Səid Rüstəmov adına 13 nömrəli uşaq musiqi məktəbinin muğam sinfini fərqlənmə diplomu ilə bitirdim.
Daha sonra bakalavr təhsilimi Azərbaycan Milli Konservatoriyasında (AMK) davam etdirdim. Azərbaycan Dövlət Mədəniyyət və İncəsənət Universitetini isə (ADMİU) magistr pilləsi üzrə fərqlənmə diplomu ilə başa vurdum. 2014-cü ildə muğam, təsnif, xalq və bəstəkar mahnılarından ibarət “Qarabağ” adlı ilk audio diskim işıq üzü gördü. Bir müddət sonra türk xalqlarının “Beynəlxalq musiqi yarışması”nın qalibi seçildim. İlk dəfə 2017-ci ildə Beynəlxalq Muğam Mərkəzində solo konsert proqramı ilə çıxış etdim.
- “Muğam” Televiziya Müsabiqəsinin mükafatçısı kimi fikirlərinizi oxucularımızla bölüşərdiniz...
- Muğam Televiziya Müsabiqəsi Heydər Əliyev Fondunun dəstəyi ilə 2005-ci ildən fəaliyyət göstərir. Azərbaycan muğamının müasir tarixində Birinci vitse-prezident, Heydər Əliyev Fondunun prezidenti Mehriban Əliyevanın danılmaz rolu var. UNESCO-nun Bəşəriyyətin Şifahi və Qeyri-Maddi İrsinin şah əsərləri Siyahısına daxil edilmiş Azərbaycan muğamının dünyada geniş təbliği məqsədilə Bakıda yaradılan Beynəlxalq Muğam Mərkəzi məhz Mehriban xanım Əliyevanın milli mədəniyyət nümunələrimizə göstərdiyi diqqət və qayğının bariz nümunəsidir. Beynəlxalq Muğam Mərkəzində Azərbaycan Televiziyası, Heydər Əliyev Fondu və Mədəniyyət Nazirliyinin dəstəyi ilə keçirilən “Muğam” Televiziya Müsabiqələri də məhz onun diqqət və qayğısı ilə dünyaya səs salır. Müsabiqə sayəsində hər dəfə neçə-neçə istedadlı xanəndələr kəşf olunur. Yüzlərlə ifaçı arasından seçilən müsabiqədə iştirak edən xanəndələr ustadlar qarşısında çıxış etdikləri üçün şanslıdır. Çox şanslıyam ki, onların sırasında mən də varam. Müsabiqə zamanı ifa etdiyim muğam kombinasiyası televiziya və radionun “Qızıl fondu”nda saxlanılır. Bu da mənim üçün olduqca xoşdur.
- Repertuarınızda əsasən hansı mahnılar üstünlük təşkil edir?
- Artıq sırf öz repertuarımı formalaşdırmışam. Burada mənə məxsus mahnılar yer alır. Bəstəkarlara mahnını sifariş edirəm və mənə özəl yeni bir mahnı yazılır. Düşünürəm ki, dinləyicilərim məni öz mahnılarımla daha yaxşı qəbul edirlər. Bununla paralel olaraq təbii ki, retro mahnılara da müraciət edirəm.
- Pop, yoxsa muğam janrında ifa etmək sizin üçün daha doğmadır?
- Əslində bəyəndiyim, ruhuma yaxın olan əsərləri ifa edirəm. Mənim üçün onun hansı janrda olması vacib şərt deyil. Təbii ki, istisna janrlar da var. Yəni, rok və rep janrlarında heç zaman ifa etmərəm. Özümü o istiqamətdə sınamağı düşünmürəm. Ümumiyyətlə, pop sözünün mənası məşhur deməkdir. Bir məqamı mütləq qeyd eləmək lazımdır ki, istənilən mahnı muğam üzərində qurulur. Zənnimcə, muğamı az da olsa duyan ifaçı üçün musiqi seçimi etmək qat-qat daha rahatdır. Həmişə ifa etdiyim musiqi ilə aramda bir bağ yaranır və onu sadəcə tamaşaçıya necə təqdim edəcəyimi düşünürəm.
- Bəstəkar kimi fəaliyyətiniz barədə nələr söyləyə bilərsiniz?
- Mən özümü qətiyyən bəstəkar adlandıra bilmərəm. Çünki bunun üçün əvvəlcə vacib şərt həmin sahə üzrə təhsil almaqdır. Bəstəkarlıq sinfini bitirmək lazım gəlir. Sadəcə musiqiçi kimi öz daxili aləmimdə cızma-qara edirəm. Həvəskar olaraq musiqi əsərləri bəstələyirəm. “Mən olmamışam”, “Sevir məni”, “Yaşayıram sənin üçün” və başqa mahnılarım buna misal ola bilər. Bunların musiqisevərlər tərəfindən sevildiyinin şahidi oluram. Sevindirici haldır ki, bir çox tanınmış ifaçılar da bəstələrimi repertuarına daxil edib.
- Bir az da gələcək planlarınızdan danışardınız...
- Gələcəyə dair planlar saysız-hesabsızdır. Yaradıcılıq tükənmir. Daim öz üzərimdə çalışıram. Yaradıcılıq varsa, mütləq inkişaf da var. Demək olar ki, hər ay dinləyicilərimə yeni mahnı təqdim etməyə çalışıram. ABŞ-ın bir çox şəhərlərində konsertlərim oldu. Keçən ilin mayında Heydər Əliyev Sarayında solo konsertim keçirildi. Konsert və yeni mahnıları dinləyicilərə, pərəstişkarlarıma təqdim etməkdə həvəsliyəm. Sevdiyim sənətlə məşğul olmaq mənə mənəvi zövq yaşadır. Şanslıyam ki, xalqımızın min illərdən süzülüb gələn muğam irsini yaşatmaq və gələcək nəsillərə ötürmək kimi böyük bir missiyanı daşıyanlar sırasında mən də varam.
Bölmənin digər xəbərləri
