Altıncı “Yüksəliş” müsabiqəsinin qalibi Rüfət Babayev ilə MÜSAHİBƏ VİDEO
Bakı, 28 avqust, AZƏRTAC
“Yüksəliş” müsabiqəsində qalib olmaq üçün təkcə bilik kifayət etmir, bəzən dayanmaq, yenidən cəhd etmək və öz üzərində çalışmaq da lazım gəlir. Altıncı “Yüksəliş” müsabiqəsinin qalibi Rüfət Babayevin hekayəsi məhz bu yolun nümunələrindəndir. O, müsabiqədə müəyyən mərhələdə dayansa da, bu nəticəni son deyil, özünü inkişaf etdirmək üçün bir fürsət kimi dəyərləndirib və növbəti cəhdində qalib olub.
Azərbaycan Dövlət İqtisad Universitetində maliyyə üzrə bakalavriat, bank işi üzrə magistratura təhsili almış Rüfət Babayev hazırda Azərbaycan Beynəlxalq Bankında baş məhsul sahibi vəzifəsində çalışır. O, AZƏRTAC-a müsahibəsində “Yüksəliş”də keçdiyi yoldan, qalib olmaq üçün vacib hesab etdiyi bacarıqlardan və müsabiqədən sonra qarşısına qoyduğu hədəflərdən danışıb.
-Necə oldu ki, “Yüksəliş” müsabiqəsində iştirak etməyə qərar verdiniz?
- “Yüksəliş” müsabiqəsində iştirakım əslində bir neçə il əvvəl başlayıb. Müsabiqəyə bir neçə dəfə qatılsam da, müəyyən mərhələdə dayanmışdım. Zaman keçdikcə həmin mərhələdə iştirakçıdan gözlənilən tələbləri daha yaxşı anladım və öz üzərimdə çalışaraq həmin istiqamətlərdə inkişaf etdim. Nəticədə növbəti dəfə həmin mərhələni keçərək digər mərhələlərdə də irəlilədim və müsabiqənin qalibi oldum.
- “Yüksəliş” müsabiqəsinin hansı mərhələsi sizin üçün daha yaddaqalan oldu?
- Müsabiqənin hər bir mərhələsi özündə müəyyən təcrübə və yeni bacarıqların qazanılmasını ehtiva edir. Lakin sonuncu - final mərhələsi mənim üçün xüsusilə əhəmiyyətli olub. Yarımfinal və final mərhələləri konsept baxımından bir-birinə yaxın olsa da, finalda tapşırıqların mürəkkəblik səviyyəsi, eləcə də iştirakçıların bilik və bacarıqları bu mərhələni daha maraqlı edirdi.
Final mərhələsinin əsas xüsusiyyəti yalnız fərdi bilik və bacarıqların deyil, eyni zamanda, komanda daxilində əməkdaşlıq və ünsiyyət bacarıqlarının nümayiş etdirilməsidir. Burada əsas məqsəd masa ətrafında olan həmkarlarla birlikdə tapşırığın həllinə yönəlmək, strateji düşüncə bacarıqlarından istifadə etmək və yekun nəticəyə nail olmaqdır. Bu prosesdə liderlik keyfiyyətlərini nümayiş etdirmək də mühüm əhəmiyyət daşıyır.
-Mentorluq proqramından gözləntiləriniz nələrdir?
-Mentorluq proqramından gözləntilərim böyükdür. Nəzərə almaq lazımdır ki, proqramın mentorları ölkənin müxtəlif yüksək vəzifələrində çalışan, yüksək peşəkar potensiala malik şəxslərdir.
Mənə mentorluq edəcək şəxslərdən əsas gözləntim onların fərqli baxış bucağından mənim inkişaf etdirməli olduğum istiqamətləri müəyyənləşdirməyimə dəstək olmalarıdır. Eyni zamanda, onların şəxsi və peşəkar təcrübələrindən faydalanaraq öz inkişaf yolumu daha düzgün istiqamətləndirmək istəyirəm.
İnsan çox vaxt özünə yalnız öz baxış bucağından yanaşır və bu, müəyyən mənada komfort zonasının formalaşmasına səbəb olur. Fərqli baxış bucaqlarından özünü qiymətləndirmək və inkişaf etdirilməli məqamları müəyyənləşdirmək mühüm əhəmiyyət daşıyır. Düşünürəm ki, mentorluq proqramı bu istiqamətdə mənə əhəmiyyətli dəstək verəcək.
-Sizcə, “Yüksəliş” müsabiqəsində qalib olmaq üçün iştirakçılarda hansı xüsusiyyətlər olmalıdır?
-Mən “Yüksəliş” müsabiqəsini şərti olaraq iki əsas hissəyə bölürəm. İlk üç mərhələ daha çox fərdi bilik və bacarıqların qiymətləndirilməsinə yönəlib. Yarımfinal və final mərhələlərində isə fərdi bilik və bacarıqlardan əlavə, strateji düşüncə, komanda idarəetməsi, dəyişikliklərə uyğunlaşma və komanda daxilində effektiv ünsiyyət kimi bacarıqlar ön plana çıxır.
Fərdi bilik və bacarıqlar insanı müəyyən mərhələyə qədər irəli apara bilər. Lakin irəli sürülən ideyanın güclü olması ilə yanaşı, komandanı həmin ideyanın düzgünlüyünə inandırmaq da mühüm bacarıqdır. Müsabiqə zamanı bununla bağlı müxtəlif nümunələrin şahidi oldum. Bəzən kifayət qədər ciddi arqumentlər irəli sürən iştirakçılar həmin arqumentlərin yekun nəticəyə təsirini əsaslandıra bilmirdilər.
Bu baxımdan effektiv idarəçilik xüsusilə önəmlidir. “Yüksəliş”də də vurğulandığı kimi, idarəetmə ilə effektiv idarəetmə arasında fərq var. İdarəetmə masanı idarə etməkdirsə, effektiv idarəetmə həm prosesi düzgün istiqamətləndirmək, həm də komandanı yekunda düzgün nəticəyə çatdırmaqdır. Hesab edirəm ki, məhz bu bacarıqlar namizədin uğur qazanmasının əsas meyarlarındandır.
- “Yüksəliş” müsabiqəsinin qalibi olaraq qazandığınız 20 min manatlıq pul mükafatını hansı istiqamətdə xərcləməyi planlaşdırırsınız?
- Son bir neçə həftədir bu barədə düşünürəm. Ətrafımdakı insanlar mükafatın xərclənməsi ilə bağlı müxtəlif təkliflər irəli sürürlər. Mən isə bu vəsaiti, ilk növbədə, peşəkar inkişafıma və təhsilimə yönəltmək istəyirəm.
Magistr təhsilim var və bundan sonrakı mərhələdə daha yüksək səviyyəli təhsil, xüsusilə MBA proqramında, eləcə də xaricdə təhsil almaqla bağlı planlarım var. Hesab edirəm ki, bu vəsait həmin məqsədlərin reallaşdırılmasına mühüm töhfə verə bilər.
- “Yüksəliş” müsabiqəsində qalib olduqdan sonra iş, ailə və dostlar arasında sizə münasibətdə hər hansı dəyişiklik oldumu?
- Ailə daxilində münasibətin dəyişdiyini deyə bilmərəm. Çünki bir ailə başçısı kimi mənə verilən dəyər “Yüksəliş” müsabiqəsinin qalibi olub-olmamağımdan asılı deyil.
İş mühitində isə bu qələbəni daha çox özümə münasibət baxımından qiymətləndirirəm. Bu nəticə mənim üçün bir növ özümü sübut etmək, eyni zamanda, potensialımı təsdiqləmək imkanı oldu. İnsan həyatında müəyyən uğursuzluqlarla qarşılaşdıqda bəzən özünü günahlandırır. Mən də müsabiqəyə hazırlıq prosesində inkişaf etdirməli olduğum müəyyən istiqamətlərin olduğunu düşündüm və bunların üzərində çalışmağı qarşıma məqsəd qoydum. Ətrafda isə təbii ki, təbriklər və xoş münasibət gördüm. Bununla belə, mənə yaxın insanlar “Yüksəliş” müsabiqəsinin qalibi olmasam belə, potensialımı bilirdilər. Bu qələbə, sadəcə olaraq, həmin potensialı bir növ təsdiqlədi və nəticə ilə ifadə etdi.
Bölmənin digər xəbərləri
