AMEA-da akademik Vahid Hacıyevin 95 illiyi qeyd edilib
Bakı, 21 dekabr, AZƏRTAC
Dekabrın 21-də AMEA-da görkəmli botanik alim, akademik Vahid Hacıyevin 95 illiyinə həsr olunan tədbir keçirilib. Əvvəlcə tədbir iştirakçıları İkinci Fəxri xiyabanda görkəmli alimin əziz xatirəsini ehtiramla yad edib, məzarı önünə əklil və gül dəstələri qoyublar.
AMEA-dan AZƏRTAC-a bildirilib ki, tədbir iştirakçıları foyedə akademik Vahid Hacıyevin elmi və elmi-təşkilati fəaliyyətini əks etdirən sərgi ilə tanış olublar.
Tədbirdə çıxış edən AMEA-nın prezidenti akademik İsa Həbibbəyli görkəmli alimin geobotanika sahəsində xidmətlərindən danışaraq Vahid Hacıyevin bu sahənin nəzəri istiqamətinə dərindən bələd olmaqla yanaşı, praktiki tərəflərinə də yiyələndiyini vurğulayıb, onun səhralaşma, iqlim dəyişikliyi ilə bağlı fundamental əsərlərinin bu gün də aktuallığını qoruyub saxladığını deyib.
AMEA prezidenti əlavə edib ki, akademik Vahid Hacıyev Botanika İnstitutuna rəhbərlik etdiyi 20 il ərzində elmin inkişafına böyük töhfələr verib, ömrünün sonunadək elmi tədqiqatlarla məşğul olub. Alimin davamçıları bu gün də botanika elminin inkişafı istiqamətində uğurla fəaliyyət göstərirlər.
Tədbirdə çıxış edən AMEA-nın vitse-prezidenti akademik İradə Hüseynova görkəmli alimin ölkəmizdə botanika elminin inkişafındakı xidmətlərindən danışıb. O, bu il botanik və zooloq alimlərin birgə səyi ilə Azərbaycan Respublikasının “Qırmızı kitab”ının III nəşrinin ictimaiyyətə təqdim olunmasını “Heydər Əliyev İli”nə töhfə kimi dəyərləndirib. Ümumiyyətlə, bu nəşrin ərsəyə gəlməsində mərhum akademik Vahid Hacıyevin botanika sahəsindəki tədqiqatlarının əhəmiyyətini qeyd edib.
Görkəmli alimlə tanışlığının 1987-ci ilə təsadüf etdiyini deyən akademik İradə Hüseynova bildirib ki, akademik Vahid Hacıyev sənətinə, elmə hər zaman bağlı alim olub. O, 24 yaşında namizədlik, 38 yaşında doktorluq dissertasiyası müdafiə edib. 1970-ci ildə professor elmi adını alıb, 1983-cü ildə Azərbaycan Elmlər Akademiyasının müxbir üzvü, 1989-cu ildə isə həqiqi üzvü seçilib.
Azərbaycanda geobotanika məktəbinin yaradıcısı olan Vahid Hacıyev elmi fəaliyyətinə 1949-cu ildə Botanika İnstitutunda başlayıb və ömrünün sonunadək bu qurumda müxtəlif vəzifələrdə çalışıb. Botanika İnstitutuna rəhbərlik etdiyi illərdə elmi müəssisənin maddi-texniki bazasının möhkəmləndirilməsində və kadr potensialının inkişafında böyük xidmətlər göstərib.
“Akademik Vahid Hacıyev uzun illər Böyük və Kiçik Qafqazın, eləcə də Azərbaycanın yüksək dağ çəmənlərində geobotaniki tədqiqatlar aparıb”, - deyən vitse-prezident vurğulayıb ki, o, floranın sistematikası, bitki örtüyünün, faydalı bitki ehtiyatlarının, nadir və nəsli kəsilməkdə olan bitki növlərinin öyrənilməsi problemlərinə xüsusi diqqət ayırıb. Görkəmli alim iki dəfə “Azərbaycanın bitki örtüyü” xəritəsini tərtib edib, ilk dəfə yüksək dağ çəmənlərinin bitki örtüyünü rayonlaşdırıb və assosiasiya səviyyəsində təsnifatını verib.
Daha sonra botanik alim Vahid Hacıyevə həsr olunan film nümayiş etdirilib.
Botanika İnstitutunun direktoru professor Səyyarə İbadullayeva Vahid Hacıyevin elmi, elmi-təşkilati və pedaqoji fəaliyyətindən danışıb. Qeyd edib ki, görkəmli alimin tədqiqatları 350-dən artıq məqalədə və 12 monoqrafiyada öz əksini tapıb. Vahid Hacıyevin elmi fəaliyyəti hər zaman dövlətimiz tərəfindən yüksək qiymətləndirilib. Alim müxtəlif illərdə bir sıra orden və medallarla təltif olunub, beynəlxalq elmi təşkilatların mükafatlarına layiq görülüb.
Tədbirdə Bakı Dövlət Universitetinin kafedra müdiri AMEA-nın müxbir üzvləri Elşad Qurbanov, İbrahim Əzizov, Zeynal Əkpərov, AMEA-nın vitse-prezidenti xidmətinin elmi katibi biologiya elmləri doktoru Tubuxanım Qasımzadə və digərləri çıxış edərək alimlə bağlı xatirələrini bölüşüblər.
Çıxış edənlər əslən Şuşadan olan akademik Vahid Hacıyevin böyüyüb boya-başa çatdığı Şuşa şəhərində Azərbaycan Bayrağının qürurla dalğanlanması, şəhərin işğaldan azad olunması ilə ruhunun şad olduğunu söyləyiblər.
Sonda akademik Vahid Hacıyevin ailə üzvləri adından çıxış edən oğlu, professor Rasim Hacıyev atasının xatirəsinə göstərilən hörmət və ehtirama görə tədbirin təşkilatçılarına və iştirakçılarına minnətdarlığını bildirib.
Bölmənin digər xəbərləri
