Amerika Yəhudi Komitəsinin nümayəndə heyəti Diasporla İş üzrə Dövlət Komitəsində olub
Bakı, 2 fevral, Ülviyyə Məmmədli, AZƏRTAC
Amerika Yəhudi Komitəsinin (AYK) icraçı direktoru Devid Harrisin başçılıq etdiyi nümayəndə heyəti fevralın 2-də Azərbaycanın Diasporla İş üzrə Dövlət Komitəsində olub.
AZƏRTAC xəbər verir ki, komitənin sədri Nazim İbrahimov Amerika Yəhudi Komitəsi ilə Azərbaycan arasında bir neçə il əvvəl başlayan əməkdaşlığın ildən-ilə inkişaf etdiyini söyləyib və münasibətlərin bundan sonra da dərinləşəcəyinə inandığını deyib.
Bildirib ki, Amerika Yəhudi Komitəsi Azərbaycan-ABŞ, Azərbaycan-İsrail əlaqələrinin, o cümlədən Azərbaycan və yəhudi icmaları arasındakı münasibətlərin inkişafına töhfəsini verir, ölkəmizin haqq səsinin dünyaya çatdırılmasında xüsusi rol oynayır.
Azərbaycan yeganə ölkədir ki, burada əsrlәr boyu yaşayan yәhudilәrə münasibətdә bir dәfә dә olsun antisemitizm halları baş vermәyib. Devid Harris çıxışlarında, kitablarında da qeyd edib ki, hətta ABŞ-ın özündə belə antisemitizm hallarına yol verilib, Azərbaycanda isə hər zaman yəhudilərə əsl qardaşlıq münasibəti olub.
AYK-nın icraçı direktoru Devid Harris Azərbaycanın həm ABŞ-ın strateji maraqlarından irəli gələrək, həm bir tolerantlıq modeli olaraq, həm də qarşılıqlı hörmət nümunəsi göstərən bir ölkə kimi dəyərini yüksək qiymətləndirdiklərini bildirib. D.Harris qeyd edib ki, Azərbaycanın İsraillə münasibətlərinin dərinliyi, ABŞ üçün nə dərəcədə önəmli olması, müasir və dünyəvi ölkə kimi nümunəviliyi, Avropanın enerji təhlükəsizliyində önəmli rol oynaması daha çox təbliğ edilməlidir. “Biz Azərbaycanın dostları olaraq ölkənin ABŞ-da və bütün dünyada daha geniş təbliği üçün əlimizdən gələni etməliyik”, - deyə o, əlavə edib.
D.Harris bildirib ki, Azərbaycanda yaşayan müsəlman, yəhudi və xristian dini liderlərinin ABŞ-a səfərləri təşkil edilməli, onlar Birləşmiş Ştatlar ictimaiyyətini Azərbaycandakı tolerantlıq və dinlərarası xoş münasibət barədə məlumatlandırmalıdırlar.
Bölmənin digər xəbərləri
