Amerikalı basketbolçu: Bakıda mənzərə və memarlıq həqiqətən heyrətamizdir
Bakı, 1 noyabr, AZƏRTAC
“Lənkəran şəhəri basketbola həqiqətən fokuslana biləcəyiniz bir yerdir. Ətrafda diqqəti yayındıran şeylər yoxdur və ən çox bunu sevirəm”.
AZƏRTAC xəbər verir ki, bu sözləri “Lənkəran” komandasının amerikalı basketbolçusu Filmon Gebriyhit klubun rəsmi saytına açıqlamasında deyib.
O, cənub bölgəsində yaşayan insanların mehriban və qonaqpərvər olduğunu bildirib: “İstər şəkil çəkdirmələri, istərsə də söhbətləri çox səmimidir. Burada xoşuma gələn bir yemək də tapmışam - “dönər”. Bu, uzun müddətdir yediyim ən dadlı yeməkdir. Oyunlar zamanı Bakı və Sumqayıta səfər edirik. Hər üç şəhəri sevdim. Amma Bakıda mənzərə və memarlıq həqiqətən heyrətamizdir”.
Qeyd edək ki, B qrupunda yer alan “Lənkəran” komandası II turdan sonra topladığı 3 xalla 3-cü pillədə qərarlaşıb.
Bölmənin digər xəbərləri
