Andras Laszlo: USAID və ona bağlı fondlar bir çox ölkələrin siyasətinə müdaxilə edib
Tbilisi, 7 fevral, AZƏRTAC
USAlD və onun kimi fondlar bəzən başqa ölkələrdə siyasi fəaliyyət göstərən QHT-ləri maliyyələşdirirdi və onların hərəkətləri bir çox hökumətlər üçün çox həssas idi.
AZƏRTAC xəbər verir ki, bu sözləri Avropa Parlamentinin Macarıstandan olan deputatı Andras Laszlo Gürcüstan mətbuatına müsahibəsində söyləyib.
Deputat deyib ki, USAID bir çox ölkələrdə onilliklər ərzində çox fəal işləyib. Təcrübəsi olanlar, USAID-in işini öz ölkələrində hiss edənlər bu təşkilatın güclü siyasi müdaxiləsini və layihələrini müşahidə ediblər. Müəyyən təcrübəmiz var və müşahidələrimiz əsasında bilirik ki, onlar həmin ölkələrin siyasətinə, seçkilərə, hətta demokratiyaya dolayı yolla müdaxilə ediblər. İndi onların fəaliyyətini qiymətləndirmək çox maraqlı bir prosesdir və bu, yeni başlayıb. Hesab edirik ki, bu, gələcəkdə Avropa siyasətini müəyyən edəcək.
“Bir neçə il əvvəl biz Macarıstanda QHT-lərin şəffaflığı haqqında qanun qəbul etmişik və bu, xaricdən maliyyələşməyə də aiddir. Bir çox başqa ölkələrin də oxşar qanunları var, o cümlədən Gürcüstanın. QHT-lərin şəffaflığı onların maliyyələşdirilməsi ilə bağlı uzun illər davam edən mübarizəni xeyli asanlaşdıracaq”, - deyə A.Laszlo vurğulayıb.
ABŞ ilə münasibətlərə də toxunan avroparlamentari deyib ki, Vaşinqtonla əlaqələr səmimiyyət, diplomatiya və siyasi dialoq üzərində qurulacaq.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
