ANTALYADA BEYNƏLXALQ GİMNASTİKA FEDERASİYASININ KONQRESİ BAŞA ÇATMIŞDIR

26.10.2004 [19:39]
Çap et
A⁺ A^-

Beynəlxalq Gimnastika Federasiyasının (FIG) Antalyada başa çatmış 75-ci konqresində italiyalı Bruno Qrandi yenidən təşkilatın prezidenti seçilmişdir. Mişel Leqliz (Fransa), Koji Takizava (Yaponiya) və Slava Korn (Kanada) vitse-prezident olmuşlar. FIG-in icraiyyə komitəsinə, Federasiyanın texniki komitələrinə də seçkilər keçirilmiş, yarışların və hakimliyin yeni qaydaları müzakirə olunmuşdur. Azərbaycan Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, ölkəmizi bu forumda Federasiyanın baş katibi Çingiz Şamilov başda olmaqla nümayəndə heyətimiz təmsil etmişdir.

Konqres çərçivəsində Azərbaycan nümayəndələri 2005-ci il oktyabrın 3-9-da Bakıda keçiriləcək bədii gimnastika üzrə 27-ci dünya çempionatının təqdimatını təşkil etmişlər. Konqres iştirakçılarına Bakı haqqında videofilm nümayiş etdirilmiş, qarşıdakı yarışlar barədə ətraflı məlumat verən informasiya bülleteni paylanmışdır. Milli federasiyaların nümayəndə heyətləri bu təqdimata böyük maraq göstərmiş, FIG rəhbərliyi isə Bakıda dünya çempionatının ən yüksək səviyyədə keçəcəyinə əmin olduğunu bildirmişdir.

Konqres FIG-in 2006-cı ildə keçiriləcək 125 illik yübileyinə hazırlıq görülməsini bu təşkilatın baş katibi səlahiyyətlərini üzərindən götürmüş Norber Bueşə həvalə etmişdir. Onun müavini Andre Qaysbuxler gələn ildən FIG-in yeni baş katibi olacaqdır. Beynəlxalq Gimnastika Federasiyasının növbəti, 76-cı Konqresi 2006-cı ildə Cenevrədə keçiriləcəkdir.

ANTALYADA BEYNƏLXALQ GİMNASTİKA FEDERASİYASININ KONQRESİ BAŞA ÇATMIŞDIR

MÜƏLLİFLƏ ƏLAQƏ

Bölmənin digər xəbərləri