Aprelin 15-də Ekoloji Biliklər Günü qeyd olunur
Bakı, 15 aprel, AZƏRTAC
Hər il aprelin 15-də dünyanın bir çox ölkəsində Ekoloji Biliklər Günü qeyd olunur.
AZƏRTAC xəbər verir ki, bu günün tarixi BMT-nin 1992-ci ildə Rio-de-Janeyroda keçirilən və ekoloji problemlərin müzakirə olunduğu konfransı ilə başlayıb. O dövrdə bəşəriyyətin yaşaması və davamlı inkişafı strategiyasının həyata keçirilməsi üçün bütün dünya əhalisinin ekoloji maarifləndirilməsinin böyük əhəmiyyəti vurğulanırdı. 2005-2014-cü illər üçün BMT-nin Davamlı İnkişaf naminə Təhsil Onilliyinin proqramına bütün dünyada ekoloji təhsilin inkişafı vəzifəsi də daxil edilib. Bu əlamətdar günün məqsədi ekoloji bilikləri təbliğ etmək, ekoloji mədəniyyəti formalaşdırmaq, cəmiyyəti aktual ekoloji problemlər və ətraf mühitin vəziyyəti haqqında məlumatlandırmaqdır. Təbii ki, Ekoloji Biliklər Günü ekologiyaya həsr olunmuş tədbirlər, mühazirələr, seminarlar, dəyirmi masalar, sərgilər və müsabiqələr üçün də bir fürsətdir.
Son vaxtlar ekoloji problemlər haqqında çox danışılır və bu, təəccüblü deyil. Belə ki, bizim və gələcək nəsillərin həyatı onların həllindən asılıdır. Ekologiya orqanizmlər və onların ətraf mühitlə əlaqələri haqqında elmdir. Ekologiya, həmçinin insanları əhatə edən mühitə və müəyyən bir ərazidə heyvan və bitkilərin yaşayış şəraitinə aiddir. Terminin özü 1866-cı ildə ortaya çıxıb. O vaxtdan bəri ekoloji problemlərin sayı artmaqda davam edib. Ancaq gələcəyimiz planetimizin vəziyyətindən asılıdır. Ətraf dünya ilə təmaslar diqqətli qarşılıqlı əlaqə olmadan mümkün deyil. Ekoloji biliklərin inkişafı BMT və ölkələrin hökumətlərinin qarşıya qoyduqları mühüm bir vəzifədir.
Azərbaycanda ətraf mühitin mühafizəsi və təbii sərvətlərdən səmərəli istifadə problemlərinin həllinə böyük əhəmiyyət verilir. Ölkəmizdə də ekologiya və ətraf mühit məsələləri hökumət və cəmiyyət üçün həmişə prioritet olaraq qalıb. Uğurlu dövlət siyasəti sayəsində Azərbaycanda istənilən ekoloji məsələlər vaxtında öz həllini tapır. Ekoloji siyasətin əsasını təşkil edən ətraf mühitin sağlamlaşdırılması sahəsində nəticələrin əldə edilməsi məqsədilə respublikada bir sıra mühüm qanunlar və normativ hüquqi sənədlər qəbul edilib, beynəlxalq qanunvericiliyin tələblərinə cavab verən dövlət proqramları hazırlanaraq təsdiq olunub. Respublika üçün aktual olan ekoloji problemlərin davamlı inkişaf prinsipləri əsasında həlli məqsədilə müvafiq dövlət proqramları çərçivəsində tədbirlər həyata keçirilir.
COP29 - Azərbaycanın daha bir uğuru
Azərbaycan ətraf mühitin mühafizəsi üzrə beynəlxalq əməkdaşlıqda fəal iştirak edir və yaşıl iqtisadiyyata keçid istiqamətində mühüm səylər göstərir. Ölkəmizdə bərpaolunan enerji sahəsində irimiqyaslı layihələr həyata keçirilir, işğaldan azad edilmiş ərazilərdə ekoloji tarazlığın bərpasına yönəldilmiş quruculuq işləri aparılır.
Prezident İlham Əliyevin uğurlu və uzaqgörən siyasəti sayəsində Azərbaycan qlobal ekoloji problemlərin həllində də liderlərdən biridir. Beləliklə, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Bakıda uğurla keçirilməsi dövlət və cəmiyyətin öz səylərini birləşdirərək çoxtərəfli dialoqa doğru irəliləməsi və bir çox məsələləri həll edə bilməsinin bariz nümunəsi oldu.
Azərbaycan Prezidenti İlham Əliyev Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində keçirilən Dini Liderlərin Qlobal Sammitinin iştirakçılarına müraciətində qeyd edib: “Bu gün dünyamızın üzləşdiyi iqlim dəyişmələri, atmosferin və ətraf mühitin çirklənməsi, quraqlıq və səhralaşma, biomüxtəlifliyin itirilməsi, su qıtlığı, ərzaq çatışmazlığı və bu kimi digər qlobal ekoloji problemlər bəşəriyyətin mövcudluğu və gələcəyi üçün ciddi təhdidlər yaratmaqdadır. İqlim böhranı və ekoloji təhlükəsizlik məsələləri dünya dövlətlərinin birgə əməkdaşlığını, beynəlxalq ictimaiyyətin bütün səviyyələrdə səylərinin birləşdirilməsini zəruri edir”.
COP29 çərçivəsində ölkəmiz gələcəyə doğru bir çox tarixi addımlar atıb. Beləliklə, Azərbaycan 2035-ci ilə qədər inkişaf etməkdə olan ölkələr üçün hər il ən azı 300 milyard ABŞ dolları məbləğində vəsaitin səfərbər edilməsini nəzərdə tutan Bakı Maliyyə Məqsədi üzrə razılığa nail oldu. Ölkəmiz karbon bazarları üçün çoxdan gecikmiş çərçivənin tamamlanmasına öz töhfəsini verdi. COP29-un sədrliyi 2035-ci ilə qədər inkişaf etməkdə olan ölkələr üçün iqlimin maliyyələşdirilməsində hər il 1,3 trilyon dollara çatmaq üçün Bakı-Belene Yol Xəritəsini hazırlamaq üzrə COP30 bürosu ilə sıx əməkdaşlıq edir.
Beləliklə, Azərbaycan COP29 çərçivəsində bir çox problemlərin, o cümlədən ekoloji problemlərin həlli üçün bütün dövlətlərin gücünü və səylərini birləşdirdi.
Bu gün ekoloji mədəniyyətin aşılanması gələcək nəsillərin sağlamlığının qorunmasının açarıdır
Ekoloji Biliklər Günü təkcə bu sahənin mütəxəssisləri üçün deyil, həm də planetdəki bütün insanlar üçün əlamətdardır, çünki bütün bəşəriyyətin gələcəyi bundan asılıdır. Bayramın mütəmadi keçirilməsi ilə ekoloji biliklər təbliğ edilir, əhalinin ekoloji mədəniyyəti formalaşır, ictimaiyyət ekoloji təhlükəsizlik sahəsində işlərin gedişi və ətraf mühitin vəziyyəti barədə məlumatlandırılır, vətəndaşlarda ekoloji düşünmə qabiliyyəti inkişaf etdirilir. Bəşəriyyət qarşıya qoyulan məqsədlərə nail olmaqla, gələcək nəsillərin sağlamlığını qorumaqla, təhlükəsiz gələcəyin təminatını qazanır.
Bölmənin digər xəbərləri
