AQTİ əməkdaşları yenidoğulmuşların hemolitik sarılığı xəstəliyinə dair elmi-tədqiqat işi aparıb
Bakı, 18 mart, AZƏRTAC
Azərbaycan Qida Təhlükəsizliyi İnstitutu (AQTİ) qida təhlükəsizliyi sahəsində yerli və xarici araşdırma institutları ilə müxtəlif istiqamətlər üzrə əməkdaşlıq edir. Əməkdaşlıq çərçivəsində aparılan elmi-tədqiqat işlərinin nəticələri nüfuzlu yerli və beynəlxalq elmi jurnallarda dərc edilir.
AQTİ-nin Azərbaycan Milli Elmlər Akademiyasının Genetik Ehtiyatlar İnstitutu ilə əməkdaşlığı çərçivəsində AQTİ-nin Elmi-tədqiqat və risklərin qiymətləndirilməsi departamentinin əməkdaşları tərəfindən “Azərbaycan populyasiyasında yenidoğulmuşların hemolitik sarılığı xəstəliyinin molekulyar-genetik tədqiqi”nə dair elmi-tədqiqat işi aparılıb.
İnstitutun İctimaiyyətlə əlaqələr və maarifləndirmə departamentindən AZƏRTAC-a verilən məlumata görə, elmi tədqiqat nəticəsində patoloji sarılıqların əksəriyyətində ana südü ilə qidalanmadan başqa sarılığa səbəb olan etiolojik faktorun məlum olmadığı müəyyən edilib. Lakin xəstəliyin əsas səbəbi olan hiperbilirubinemiyanın şiddətinin qidalanma vəziyyəti və qidalanma tipi, hamiləlik yaşı, doğuş ağırlığı, irq, coğrafi bölgə və genetik faktorlara görə də aydın şəkildə dəyişə biləcəyi qeyd olunub.
Tədqiqatın nəticələrini əks etdirən “Azərbaycan Respublikası populyasiyasında qlükoza-6-fosfatdehidrogenaza ferment çatışmazlığının yayılma tezliyi” adlı məqalə “Azərbaycan Perinatologiya və Pediatriya Jurnalı”nda nəşr olunub.
Bölmənin digər xəbərləri
