AZƏRTAC xəbər verir ki, aprelin 10-da Bakı İdman Sarayında futzal üzrə “Hyundai kuboku” turnirinin Azərbaycan üzrə seçmə turnirin final görüşü keçirilmişdir. Fevralın sonlarından start götürmüş yarışda 16 komanda mübarizə aparmışdır. Finalda isə “Araz” və “Azfen” komandaları qarşılaşmışlar. Gərgin idman mübarizəsi şəraitində keçən oyunda “Araz” futzalçıları 9:7 hesabı ilə qələbə qazanaraq, kuboka və qızıl medallara sahib olmuşlar. “Azfen” ikinci, “TT” komandasını 12:1 hesabı ilə məğlub etmiş “Asfarma” isə üçüncü yer tutmuşdur. Mükafatçılara və fərqlənmiş idmançılara medallar və qiymətli hədiyyələr təqdim olunmuşdur.
Beləliklə, “Araz” mayın 12-də Moskvada start götürəcək “Hyundai kuboku” regional turnirinin finalına vəsiqə qazanmışdır. Bu yarışda MDB və Şərqi Avropa ölkələri üzrə seçmə turnirlərin qalibləri mübarizə aparacaqlar. Regional turnirin finalına vəsiqə qazanmış iki komanda isə Almaniyada keçiriləcək dünya futbol çempionatını dörddəbir final mərhələsindən canlı izləmək imkanı əldə edəcəkdir.
