“Araz-Naxçıvan” klubu heyətini rusiyalı qapıçı ilə gücləndirib
Bakı, 19 aprel, AZƏRTAC
Futzal üzrə Azərbaycan Yüksək Liqasının lideri “Araz-Naxçıvan” heyətini yeni qapıçı ilə gücləndirib.
AZƏRTAC Azərbaycan Futzal Federasiyasının mətbuat xidmətinə istinadla xəbər verir ki, baş məşqçi Joze Alesionun komandası Dmitri Bondarevlə anlaşıb. Rusiyalı qapıçı yeni komandasında mövsümün sonunadək çıxış edəcək.
1993-cü il təvəllüdlü D.Bondarev Rusiyanın Yüksək Liqasında iştirak etmiş “Spartak-Donetsk” klubunda çıxış edib. Rostov təmsilçisi çempionatda çıxışı dayandırdığına görə, klubun bütün oyunçularına azad agent statusu verilib. Qapıçı "Baku Fire" klubu ilə oyunda debüt edəcək.
Qeyd edək ki, “Araz-Naxçıvan”ın əsas qapıçısı Rövşən Hüseynli martda Rusiyanın Super Liqasında iştirak edən “Torpedo” klubuna transfer olunub.
Bölmənin digər xəbərləri
