“Araz-Naxçıvan”ın futbolçusu: “Zirə” komandasının lider olması bizi narahat etmir
Bakı, 29 sentyabr, AZƏRTAC
“Səbail”lə matçda yaxşı oynamağımıza və çoxsaylı qol epizodları yaratmağımıza baxmayaraq, 3 xalı rəqib qazandı. Əlbəttə, futbolun bu tərəfi də var: sən vurmasan, sənin qapına qol vuracaqlar. Nəticə bizə pis təsir etdi, ancaq həmin görüşü unudub, qarşıdakı matça konsantrasiya olmuşuq.
AZƏRTAC xəbər verir ki, bu sözləri “Araz-Naxçıvan” komandasının futbolçusu Tural Bayramlı Azərbaycan Premyer Liqasının VIII turunda “Zirə” ilə keçirəcəkləri oyunu şərh edərkən deyib.
25 yaşlı yarımmüdafiəçi matça həvəslə hazırlaşdıqlarını və komanda daxilində əhvali-ruhiyyənin yüksək olduğunu bildirib: “Oyunumuzu bu şəkildə davam etdirsək, həm xal ehtiyatımızı artıracağıq, həm də komandalara başağrısı olacağıq. “Zirə” çempionatın iddialı klublarından biridir. Baş məşqçi Rəşad Sadıqov yaxşı işlər görüb. Bazar günü keçiriləcək matçda özümüzə uğurlar arzulayıram”.
T.Bayramlı rəqibin turnir cədvəlinə başçılıq etməsinin onlar üçün narahatlıq yaratmadığını əlavə edib: “Meydana çıxanda rəqibin hansı pillədə qərarlaşmasına deyil, öz oyunumuza, baş məşqçinin tapşırıqlarını yerinə yetirməyə diqqət edirik. Təbii ki, zirvədə qərarlaşıblarsa, deməli, güclüdürlər. Meydana qələbə qazanmaq üçün çıxacağıq. Buna nə dərəcədə nail olacağımız oyun zamanı yaradacağımız qol epizodlarını reallaşdırmağımızdan asılıdır. Azarkeşlər baxımlı və maraqlı futbol izləyəcəklər”.
Qeyd edək ki, oktyabrın 1-də “Dalğa Arena”da keçiriləcək “Araz-Naxçıvan” - “Zirə” qarşılaşması saat 18:30-da başlayacaq.
Bölmənin digər xəbərləri
