ARDNŞ-DƏ “EKO-ERUDİT” BREYN-RİNQ YARIŞININ FİNALÇILARI İLƏ GÖRÜŞ OLMUŞDUR
Bakı, 22 aprel (AZƏRTAC). Aprelin 22-də Azərbaycan Respublikası Dövlət Neft Şirkətinin (ARDNŞ) baş ofisində qurumun Ekologiya İdarəsinin təşkilatçılığı ilə Bakı şəhərinin məktəbliləri arasında ekoloji mövzuda keçirilən “Eko-erudit” breyn-rinq yarışının finalına vəsiqə qazanmış 8 komandanın üzvləri ilə görüş keçirilmişdir.
Beynəlxalq Yer gününə təsadüf edən görüşdə şirkətin ekologiya üzrə vitse-prezidenti Muxtar Babayev bildirmişdir ki, “Ekologiya ili” çərçivəsində ARDNŞ tərəfindən ekoloji maarifləndirmə istiqamətində bir sıra tədbirlər həyata keçirilir. Şirkətin ətraf mühitin və təbiətin mühafizəsi məsələlərini daim diqqət mərkəzində saxladığı qeyd edilmiş, yer kürəsinin ekoloji vəziyyətinin yaxşılaşdırılması üçün ictimaiyyətin səylərinin birləşdirilməsi ideyalarının əhali arasında daim təbliğ olunmasının vacibliyi nəzərə çarpdırılmışdır.
Məlumat verilmişdir ki, şirkət tərəfindən ekoloji maarifləndirmə istiqamətində həyata keçirilən layihələrin əsas məqsədi gənc nəsildə təbiətə sevgi və ekologiyaya ziyan vurmamağı aşılamaqdır. ARDNŞ-in əməkdaşları tərəfindən bir sıra ərazilərdə, o cümlədən Qala qəsəbəsində neftlə çirklənmiş böyük bir ərazi təmizlənmiş, gələcəkdə burada park zonasının salınması, alternativ enerji mənbələrindən istifadə nəzərdə tutulmuşdur. Şirkət əhalinin ekoloji cəhətdən maarifləndirilməsi istiqamətində tədbirləri gələcəkdə də davam etdirəcəkdır.
Məktəblilər “Eko-erudit” breyn-rinq yarışının azərbaycanlı gənclərin maarifləndirilməsi və təbiətə məhəbbət ruhunda tərbiyələnmələri baxımından xüsusi əhəmiyyət kəsb etdiyini qeyd etmişlər.
Sonra görüş iştirakçıları ARDNŞ-in Ekologiya İdarəsinin əməkdaşları ilə birgə Qala qəsəbəsində yerləşən “Ekoloji park”da ağacəkmə kampaniyasına qoşulmuşlar.
Bölmənin digər xəbərləri
