Argentinada Azərbaycanın nailiyyətlərinə həsr olunmuş beynəlxalq konfrans keçiriləcək
Bakı, 23 oktyabr, AZƏRTAC
Noyabrın 12-də “San Cristóbal” təşkilatı Buenos-Ayresdə “Konstitusiya və Suverenlik İli” şərəfinə Azərbaycanın müasir nailiyyətlərinə və fəal xarici siyasətinə həsr olunmuş beynəlxalq konfrans keçirəcək.
AZƏRTAC xəbər verir ki, tədbirdə əsas məruzəçi Azərbaycan Dillər Universitetinin fəxri professoru, beynəlxalq siyasət və diplomatiya üzrə ekspert Piter Marko Teys olacaq.
Professor Teys öz təqdimatında Azərbaycanın sürətli iqtisadi inkişafı və Ermənistan tərəfindən təxminən otuz il ərzində işğal olunmuş ərazilər üzərində nəzarətini bərpa etməsindən danışacaq. Azərbaycan tarixinin faciəvi fəsillərinə, o cümlədən 1918–1921, 1948–1953 və 1987–1991-ci illərdə Qərbi Azərbaycanda (indiki Ermənistan) etnik təmizləməyə xüsusi diqqət yetiriləcək.
Bundan başqa, konfransda Azərbaycanın Argentina və Paraqvay ilə ikitərəfli əlaqələrinin inkişafı da vurğulanacaq. İştirakçılar turizm, mədəniyyət və texniki mübadilə sahələrində əməkdaşlıq sazişlərinin həyata keçirilməsini, eləcə də ölkələr arasında dostluğun möhkəmlənməsinə töhfə verən parlamentlərarası əlaqələrin və siyasi məsləhətləşmələrin əhəmiyyətini müzakirə edəcəklər.
Paraqvaylı senator Enrike Baketta və “San Cristóbal” təşkilatının sədri Manuel Fernandesin tədbirdə iştirakı gözlənilir. Konfrans Azərbaycan və Latın Amerikası ölkələri arasında humanitar və diplomatik dialoqun inkişafında mühüm addım olacaq.
Bölmənin digər xəbərləri
