Arif Əsədov: Almaniya millisi yeni sistemlə oynamağa hələ öyrəşməyib
Bakı, 5 iyun, AZƏRTAC
Dünən bir çox futbol mütəxəssisi Almaniyanın növbəti mərhələyə keçəcəyinə inanırdı. Ev sahibi olmaları da onlar üçün üstünlük sayılırdı.
Bu sözləri AZƏRTAC-a açıqlamasında UEFA-nın Bakıda keçirilən məşqçi kurslarında təlimatçı kimi çalışan Arif Əsədov Millətlər Liqasının yarımfinal mərhələsində Portuqaliya millisinin Almaniyanı 2:1 hesabı ilə məğlub edərək finala yüksəlməsi barədə danışarkən deyib.
O, hər iki komandanın ilk dəqiqələrdən ehtiyatlı oyuna üstünlük verdiyini bildirib: “Almaniya seçməsi yeni sistemlə meydana çıxmışdı. Bu, “üçlü” mərkəz müdafiəsi idi. Ərazi üstünlüyü Bundestimin tərəfində olsa da, təhlükəli vəziyyətləri daha çox portuqaliyalılar yaradırdı. Onlar həmişəki kimi oyunu əks hücumlar üzərində qurmuşdular. Düşünürəm ki, bu taktika Roberto Martinesin komandasına qələbəni gətirdi. Almanlar isə yeni sistemlə oynamağa hələ öyrəşməyib”.
54 yaşlı mütəxəssis Portuqaliya millisində yaxşı gənc oyunçuların olduğunu söyləyib: “Yaşları çox olan Brunu Fernandeş və Kriştianu Ronaldunu çıxsaq, digərləri gənclərdir. Onların funksional, fiziki və beyin sürətlərini nəzərə alsaq, gələcəkdə güclü Portuqaliya millisi görə bilərik”.
A.Əsədov bu gün İspaniya və Fransa yığmaları arasında keçiriləcək ikinci yarımfinal görüşü barədə də danışıb: “Burada hansı komandanın finala yüksələcəyini demək çətindir. Hər iki yığmanın oyun üslubu bir-birinə bənzəyir. Düzdür, ispanlar qısa ötürmələri və topa nəzarəti, fransızlar isə topu ələ keçirdikdən sonra tez bir zamanda hücumu qolla yekunlaşdırmağı xoşlayırlar. Fransa millisinin heyətində son nöqtəni qoya bilən futbolçular da var”.
Qeyd edək ki, İspaniya – Fransa oyunu bu gün Bakı vaxtı ilə saat 23:00-da “Ştutqart Arena”da keçiriləcək. Final qarşılaşması isə iyunun 8-də reallaşacaq.
Bölmənin digər xəbərləri
