Arif Əsədov: “Qarabağ”la “Sabah” arasında çempionluq uğrunda ciddi mübarizə gedəcək
Bakı, 5 yanvar, AZƏRTAC
Premyer Liqada mövsümün həlledici mərhələsi başlayır. Qarşıda hazırlıq dönəmi və daha 17 oyun var. Hazırda əsas məsələ komandaların qış fasiləsindən həm transfer, həm də hazırlıq baxımından nə dərəcədə səmərəli yararlana bilməsidir.
Bu sözləri AZƏRTAC-a açıqlamasında UEFA-nın Bakıda keçirilən məşqçi kurslarında təlimatçı kimi çalışan Arif Əsədov Misli Premyer Liqasının ikinci hissəsi və komandaların qış hazırlıq planlarından gözləntiləri barədə danışarkən deyib.
O, birinci yer uğrunda "Qarabağ" və "Sabah" komandalarının daha şanslı olduğunu söyləyib: “Təbii ki, bu kollektivlər arasında çempionluq uğrunda ciddi mübarizə gedəcək. Bu, artıq göz önündədir. İkinci-dördüncü yerlər və kubok uğrunda mübarizəyə isə bir neçə komanda iddialıdır. Turnir cədvəlində ilk altı sırada yer alan bütün klubların real şansı var. "Neftçi"dən də gözləntilər çoxdur. Yeni baş məşqçi təyin olunub və qış hazırlıq dönəmindən maksimum yararlanmalıdırlar. Fasilədən sonra ilk turlarda 2-3 qələbə qazanmaqla, üst pillələr uğrunda mübarizəyə tam güclə qoşula bilərlər”.
Mütəxəssis avrokuboka vəsiqə qazanma ehtimalının yüksək olduğu komandaların da adlarını çəkib: "Zirə", "Turan Tovuz", "Araz-Naxçıvan", "Sumqayıt" və təbii ki, "Neftçi" avrokuboklara vəsiqə üçün yarışacaqlar. Bu klubların hər birinin turnir cədvəlində və oyunlarda göstərdiyi performans avrokubok uğrunda ciddi rəqabət aparacaqlarını deməyə əsas verir”.
Qeyd edək ki, “Sabah” komandası 37 xalla qış fasiləsinə lider yollanıb.
Bölmənin digər xəbərləri
