Arxeoloqlar Xocalı soyqırımı qurbanlarının xatirəsini anıblar
Bakı, 26 fevral, AZƏRTAC
AMEA-nın Arxeologiya və Antropologiya İnstitutunda Xocalı soyqırımının 33-cü ildönümünə həsr olunmuş anım tədbiri keçirilib.
Bu barədə AZƏRTAC-a institutdan məlumat verilib. Tədbirdə institutun direktoru tarix üzrə fəlsəfə doktoru, dosent Fərhad Quliyev Xocalı faciəsinin XX əsrdə insanlığa qarşı törədilmiş bəşəri cinayətlər sırasında öz qəddarlığına görə xüsusilə fərqləndiyini bildirib.
Diqqətə çatdırılıb ki, Ümummilli Lider Heydər Əliyev respublika rəhbərliyinə qayıdandan sonra Xocalı soyqırımına siyasi-hüquqi qiymət verildi, qətliamın dünya miqyasında tanınması istiqamətində Prezident İlham Əliyevin və birinci xanım Mehriban Əliyevanın təşəbbüsü və rəhbərliyi ilə məqsədyönlü və planlı təbliğat-təşviqat siyasəti aparıldı. Bu kontekstdə Heydər Əliyev Fondunun birbaşa dəstəyi ilə Leyla Əliyevanın başçılığı altında “Xocalıya ədalət!” beynəlxalq kampaniyasının nail olduğu böyük uğurlar xüsusi qeyd edilməlidir. Görülən işlər nəticəsində 40-dək ölkənin parlamentləri tərəfindən Xocalı soyqırımı tanınaraq bəşəriyyətə qarşı cinayət kimi siyasi qiymət alıb.
“2020-ci ildə Müzəffər Ali Baş Komandan İlham Əliyevin müdrik rəhbərliyi ilə qəhrəman Azərbaycan əsgərlərinin şücaəti sayəsində 44 günlük müharibədə və 2023-cü ildə uğurlu antiterror tədbirləri nəticəsində torpaqlarımızın işğaldan və terrorçulardan azad edilməsini Xocalı sakinlərinə qarşı törədilmiş soyqırımının qisasının alınması kimi dəyərləndirməliyik”, – deyə Fərhad Quliyev bildirib.
Tədbir iştirakçıları bir dəqiqəlik sükutla Xocalı soyqırımı qurbanlarının və Vətən uğrunda həyatını qurban vermiş bütün şəhidlərimizin əziz xatirəsini anıblar.
Professor Hidayət Cəfərov çıxışında bildirib ki, ötən əsrin 80-ci illərində Xocalı və ətrafında yerləşmiş abidələrin tədqiqində iştirak edib, ərazidəki azərbaycanlı yaşayış məskənlərinin iqtisadi durumunun şahidi olub. O bildirib ki, Ulu Öndər Heydər Əliyev Moskvaya dəvət olunduqdan sonra ermənilərin məqsədli şəkildə Xocalı şəhərini və onun azərbaycanlı əhalisini sıxışdırmaq, izolə etmək istiqamətində fəaliyyətini görmək olardı.
İnstitutun aparıcı elmi işçisi Pərviz Qasımov isə deyib: “Bölgədə aparılan tədqiqatlar zamanı görmək olardı ki, müsəlman azərbaycanlıların qəbirləri təkcə erməni işğalçıları tərəfindən deyil, hətta 2020-ci ildə ərazidə yerləşmiş Rusiya sülhməramlılarının Xocalı aeroportunun perimetri boyunca hərbi istehkamlar inşa etdiyi zaman da dağıdılıb”.
İnstitutun aparıcı elmi işçisi dosent Şamil Nəcəfov Xocalı nekropolunda aparılmış qazıntılar barədə məlumat verib.
Tədbirdə erməni işğalçılarının törətdiyi soyqırımı qurbanlarının qalıqlarının aşkar edilməsində institutun Məhkəmə arxeologiyası şöbəsi əməkdaşlarının önəmli rolundan söz açılıb. Eyni zamanda, Qarabağda, Şərqi Zəngəzurda və xüsusilə Xocalıda çalışan arxeoloqların dövlət tərəfindən aparılan nəhəng tikinti-bərpa işlərinin şahidi olduqları vurğulanıb.
Bölmənin digər xəbərləri
