AŞPA-nın fəaliyyət tərzi olan ikili standartlar, riyakarlıq, qərəzkarlıq və ikiüzlülük
Bakı, 27 yanvar, AZƏRTAC
Avropa Şurası Parlament Assambleyasının (AŞPA) Azərbaycana qarşı münasibətdə son ədalətsiz, beynəlxalq hüququn norma və prinsiplərinə zidd davranışları istər-istəməz yaxın tarixə, daha dəqiq desək, ölkəmizin bu quruma üzv qəbul olunduğu dövrə qısa ekskurs etmək zərurəti yaradır.
Bu barədə AZƏRTAC-a açıqlamasında Azərbaycan Dövlət İqtisad Universitetinin (UNEC) professoru, Qərbi Azərbaycanlılar İcmasının Qadınlar Şurasının üzvü Afət Abbasova məlumat verib.
O qeyd edib ki, həmin dövrdə beynəlxalq səviyyədə tanınmış ərazilərinin 20 faizi Ermənistanın işğalı altında olan Azərbaycan öz haqq səsini dünya ictimaiyyətinə çatdırmaq üçün dayanıqlı və etibarlı platforma axtarışında idi. Belə bir həlledici məqamda, yəni 2001-ci ildə Avropa Şurasına üzv qəbul olunanda Azərbaycanın bu beynəlxalq qurumun 1988-ci ildə Ermənistanın hərbi təcavüzü nəticəsində hüquqları pozulmuş yüz minlərlə azərbaycanlının öz dədə-baba yurdlarına qayıtmaq kimi hüquqlarının bərpasında ölkəmizə kömək edəcəyinə, beləliklə də regionda davamlı sülhün əldə olunacağına səmimi bir ümidi, gözləntisi var idi.
“Lakin çox təəssüflər olsun ki, ötən 23 ildə xalqımızın və dövlətimizin bu gözləntiləri özünü doğrultmadı. Bütün bunlardan sonra bu gün ortaya haqlı sual çıxır: Necə oldu ki, Azərbaycan Avropa Şurasına üzv qəbul olunduğu 2001-ci ildən 2020-ci ilin sentyabr ayına, yəni İkinci Qarabağ müharibəsi başlayanədək Ermənistanın davam edən hərbi təcavüzünün qarşısını almaq üçün heç bir əməli tədbir görməyən bu qurum birdən-birə təcavüzkarın, yəni 30 il Azərbaycan torpaqlarını işğalda saxlamış Ermənistanın, artıq tarixin zibilxanasına atılmış Qarabağdakı separatçı rejimin müdafiəsinə qalxdı? Axı Azərbaycan Respublikasının Avropa Şurası Parlament Assambleyasındakı nümayəndə heyətinin yanvarın 24-də qurumun zalındakı bəyanatında deyildiyi kimi, 2001-ci ildən 2020-ci ilə qədər olan 19 il ərzində AŞPA heç vaxt işğalçı dövlət olan Ermənistandan Avropa Şurasının əsas dəyər və prinsiplərinə zidd hərəkətlərinə görə cavab verməyi tələb etməyib. Amma indi - təcavüz, işğal və zorakı separatizm üzərində tarixi Qələbəmizdən, xüsusilə ərazi bütövlüyümüzün və suverenliyimizin tam bərpası ilə nəticələnmiş 2023-cü ilin 19 sentyabrında Qarabağda birgünlük lokal antiterror tədbirlərindən sonra xalqımız və dövlətimiz AŞPA və digər Avropa strukturları tərəfindən təşkil olunmuş qarayaxma kampaniyası ilə üz-üzə qalıb”, - deyə A.Abbasova bildirib.
Professor vurğulayıb ki, təxminən 20 ilə yaxın müddətdə Azərbaycan nümayəndə heyəti Assambleyanın sessiyalarında erməni işğalının ağır nəticələrini gündəmə gətirərkən avropalı parlamentarilər daş atıb başlarını tuturdular ki, AŞPA münaqişə ilə bağlı məsələlərin müzakirəsi üçün düzgün format deyil. İndi isə həmin AŞPA və həmin deputatlar utanıb-qızarmadan, abır-həya etmədən bunun əksini deyirlər. Dünya erməni lobbisinin əlində alət olan AŞPA-nın bu üzdəniraq deputatları Azərbaycanı qaralamaq üçün heç bir fürsəti əldən vermir, həyasızcasına Azərbaycanı Qarabağın erməni əhalisinin “etnik təmizləməsində” və onların buradan zor gücünə qovulmasında ittiham edirlər. Halbuki Ermənistanın baş naziri Nikol Paşinyan ermənilər Qarabağı könüllü surətdə tərk edən zaman bölgədə olmuş dünyanın ən böyük və nüfuzlu beynəlxalq təşkilatı olan BMT-nin müşahidə missiyası onların ərazisini öz istəkləri ilə, heç bir zorakılıq halları olmadan köçmələrini bəyan etmişdi.
“Yenə də ortaya haqlı sual çıxır: Bəs belə bir reallıq şəraitində AŞPA-nın Azərbaycan nümayəndə heyətinin etimadnaməsini təsdiq etməməkdə məqsədi nədir? Əslində, səbəb heç də bu ideyanın “müəllifi”, Almaniyadan olan deputat Frank Şvabenin iddia etdiyi kimi, Azərbaycanın AŞPA müşahidəçilərini fevralın 7-də keçiriləcək növbədənkənar prezident seçkilərini izləməyə dəvət etməməsi və guya qurumun missiyasını Laçın nəzarət-buraxılış məntəqəsinə buraxmaması ilə bağlı deyil, tamamilə başqadır. Fikrimizcə, əsas səbəb Azərbaycanın son illərdə biri-birinin ardınca möhtəşəm qlobal və regional əhəmiyyətli uğurlar əldə etməsi, nəhəng layihələr reallaşdırmasıdır. Ən başlıcası isə dünyanın 5 güc mərkəzini birləşdirən BMT Təhlükəsizlik Şurası kimi nüfuzlu bir qurumun 30 ildə həll edə bilmədiyini 44 günlük İkinci Qarabağ müharibəsində Azərbaycanın yerinə yetirməsidir. Azərbaycanın bir qərinədən artıq pozulmuş ərazi bütövlüyünün və suverenliyinin tam təmin edilməsi 2020-ci ilin noyabrından indiyədək Qərbin, xüsusilə Fransanın, Almaniyanın, Avropa İttifaqının, onların ideoloji və qanunverici ruporu rolunu oynayan AŞPA-nın gözlərinə ox olub batmaqdadır. Birgünlük antiterror tədbirləri ilə Azərbaycan Qarabağdakı separatizm ocağını birdəfəlik söndürdü. Bax Fransa, Almaniya, AŞPA kimi ağa qara deyən üzdəniraq “demokratları” qəzəbləndirən budur! Əlbəttə ki, qəzəblərinin bir səbəbi də onların ötən ildən Laçın yoluna, ümumilikdə Qarabağa monitorinq qrupu göndərmək cəhdlərinin alınmaması, Azərbaycan ərazisində ikinci erməni dövləti yaratmaq planlarının alt-üst olmasıdır”, - deyə o əlavə edib.
A.Abbasova bildirib ki, Azərbaycanın siyasi, iqtisadi, hərbi və digər sahələrdəki sürətli inkişafını həzm edə bilməyən üzdəniraq avropalı ermənipərəst “demokratlar” bu tərəqqinin qarşısını almaqda aciz olduqlarını artıq gizlədə bilmirlər. Bu səbəbdən də vaxtaşırı yalana, böhtana, saxtakarlığa, riyakarlığa, əsas sılahları olan ikili standartlar siyasətinə əl atırlar. Azərbaycan nümayəndə heyətinin AŞPA-nın zalında bəyanat verib Assambleyada fəaliyyətini qeyri-müəyyən müddətə dayandırmasını bildirdikdən sonra ölkəmizin təmsilçiliyinin məhdudlaşdırılması barədə bu qurumun qəbul etdiyi qətnamə “arxadan atılan daş” effekti təsiri bağışlayan uğursuz addımlardan biridir. Şübhəsiz, bu da heç bir fayda vermədi və verməyəcək də. Çünki qürurlu, müstəqil, suveren, demokratik və multikultural dövlət olan Azərbaycan Respublikası belə riyakarlıqlarla, qərəzli qətnamələrlə, təhdid və təzyiqlərlə çox qarşılaşıb və hamısından da qalib çıxıb.
Bölmənin digər xəbərləri
