AŞPA-nın ittihamları Azərbaycana qarşı qərəzli münasibətdən xəbər verir ŞƏRH
Bakı, 26 yanvar, AZƏRTAC
Avropa Şurası mühüm beynəlxalq birlik kimi öz öhdəliklərinə əsasən ədalət, bərabərlik və üzvlərinin suverenliyinə hörmət prinsiplərinə riayət etməyi qarşısına vəzifə qoymalıdır. Lakin son günlər bəzi avropalı deputatların Azərbaycanın Avropa Şurası Parlament Assambleyasındakı (AŞPA) nümayəndə heyətinə qarşı ittihamları beynəlxalq hüququn prinsiplərinə əməl olunması və dövlət suverenliyinə hörmətlə bağlı ciddi suallar yaradır. Bu, Azərbaycana qarşı açıq qərəzli münasibətdən xəbər verir.
Bu fikirləri AZƏRTAC-a açıqlamasında beynəlxalq əlaqələr üzrə ekspert Masil Dəmirov söyləyib.
O qeyd edib ki, Azərbaycan digər dövlətlərin daxili işlərinə qarışmamaq prinsiplərini unutmadan, Avropanın enerji təhlükəsizliyinin təmin edilməsində əsas rol oynayır. Ölkəmizə qarşı bu cür qərəzli yanaşma Avropanın diplomatik nüfuzuna ciddi təsir göstərə, bir çox beynəlxalq məsələlərin həllini çətinləşdirə və mənfi təsəvvürlər yarada bilər. Bu qərəzli yanaşmaya daha dərindən nəzər salsaq, o zaman Avropa Şurası tərəfindən açıq nümayiş olunan Azərbaycanofobiya beynəlxalq münasibətlərin ümumi dinamikasına, o cümlədən ümumi problem və çağırışların həllinə təsir göstərə bilər.
Müasir beynəlxalq münasibətlər sisteminin dövlətlərin müstəqilliyi və suverenliyi prinsipi üzərində qurulduğunu diqqətə çatdıran ekspert əlavə edib: “Azərbaycanın AŞPA-dakı nümayəndə heyətinin səlahiyyətlərinə dair qərar belə mühüm prinsipi şübhə altına alır və bu, dünyada sabitliyin əsaslarını sarsıda bilər.
Azərbaycan uzun müddətdir ki, regionda sabitliyin və inkişafın təmin edilməsində əsas rol oynayıb. Xüsusilə, İkinci Qarabağ müharibəsindəki Qələbədən sonra onun rolu daha da güclənib. İşğalçılar üzərində sarsıdıcı Qələbə qazanmasına baxmayaraq, Azərbaycan qalibin imtiyazlarından istifadə etmir, əksinə, regionda sülhün təmin olunması, ədalətli, mehriban qonşuluq münasibətlərinin qurulması, ümumilikdə iqtisadi vəziyyətin yaxşılaşdırılması üçün əlindən gələni edir. Dövlətimizin fəal siyasəti, xüsusilə enerji sahəsində şaxələndirməni təşviq edir və Avropanın enerji təhlükəsizliyini gücləndirir”.
Masil Dəmirovun sözlərinə görə, Azərbaycan nümayəndə heyətinin etimadnaməsini şübhə altına almaq əvəzinə, açıq dialoq və konstruktiv əməkdaşlıq təşviq edilməlidir. Bu, hər hansı anlaşılmazlığı aradan qaldırmaq və ölkələr arasında etimadı qorumaq üçün vacibdir.
“Beynəlxalq hüquq hər bir dövlətin hüquq və vəzifələrinə hörmət tələb edir. Aydın sübutlarla dəstəklənməyən ittihamlar, bu prinsipin pozulmasına gətirib çıxara və regionda əlavə gərginlik yarada bilər.
Yekun olaraq nəzərə almaq lazımdır ki, dünyanın sabitliyi bütün dövlətlərin, xüsusən də diplomatik və iqtisadi əlaqələrin möhkəmlənməsinə fəal şəkildə sərmayə qoyan ölkələrin hörmət və dəstəyini tələb edir. Azərbaycanın regionun flaqmanı olması faktlara, o cümlədən müxtəlif beynəlxalq treklərdəki apardığı konstruktiv dialoqa, sabitliyin və ədalətin təmin edilməsi üçün beynəlxalq hüququn prinsiplərinə riayətə əsaslanır”, - deyə ekspert vurğulayıb.
Bölmənin digər xəbərləri
