ASTANADA MÜSTƏQİLLİK GÜNÜ MÜNASİBƏTİ İLƏ TƏDBİR KEÇİRİLMİŞDİR
Tədbirdə Qazaxıstanın xarici işlər naziri Qasımcomərd Tokayev və digər rəsmi şəxslər, xarici ölkələrin Astanadakı səfirləri, beynəlxalq təşkilatların nümayəndələri, Azərbaycan diasporunun nümayəndələri, jurnalistlər iştirak etmişlər.
Azərbaycanın və Qazaxıstanın dövlət himnləri səsləndikdən sonra ölkəmizin Astanadakı səfiri Lətif Qəndilov Azərbaycan iqtisadiyyatının uğurlarından, Bakı-Tbilisi-Ceyhan neft kəmərinin region ölkələri üçün əhəmiyyətindən, respublikamızın Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində təşəbbüslərindən söhbət açmış, Azərbaycanın öz əraziləri hesabına ikinci erməni dövlətinin yaradılmasına imkan verməyəcəyini vurğulamışdır.
Q.Tokayev Azərbaycan və Qazaxıstan prezidentlərinin qazax neftinin Bakı-Tbilisi-Ceyhan kəməri ilə nəqli sahəsində imzaladıqları sazişin böyük əhəmiyyətini, ikitərəfli münasibətlərimizin bundan sonra da yüksələn xətlə inkişaf edəcəyini qeyd etmişdir.
Sonda böyük bəstəkarlar Üzeyir Hacıbəyovun, Qara Qarayevin və Niyazinin əsərlərindən ibarət konsert proqramı olmuşdur.
Bölmənin digər xəbərləri
