Astarada əkin sahələrini suvarma suyu ilə təmin etmək üçün sahil-bərkitmə işləri aparılır
Astara, 16 iyun, Bağır Əliyev, AZƏRTAC
Astara rayonunun əkin sahələrini suvarma suyu ilə təmin etmək üçün Meliorasiya və Su Təsərrüfatı ASC-nin Astara Suvarma Sistemləri İdarəsinin istismarında 4519 hektar suvarılan sahə mövcuddur. Bu sahələri su ilə təmin etmək üçün dörd su mənbəyindən - Astaraçay, Pensərçay, Lovayın və Xanbulançay su anbarlarından istifadə edilir.
Yanvar ayından başlayaraq rayonda çəltik əkilən sahələrin su təminatını yaxşılaşdırmaq üçün bütün əsas kanallar təmizlənilib, suvarma suyunun su tələbatçılarına itkisiz çatdırılması üçün 6000 poqonmetrdən çox kiçik kanal qazılıb, texnikanın hərəkəti mümkün olmayan həyətlərdən keçən kanallarda 3000 poqonmetrdən çox ərazi lildən təmizlənib.
AZƏRTAC-ın bölgə müxbiri xəbər verir ki, bu ilin beş ayı ərzində rayonun müxtəlif ərazilərində 70 kilometrdən çox ərazidə kanallarda təmir-bərpa işləri görülüb. Kijabə, Pensər, Kakalos və Çayoba ərazisində 3 kilometrdən çox qapalı şəbəkələrdə, 60-dan hidrotexniki qurğularda, 30-dan çox siyirtmədə təmir işləri aparılıb.
Sel suları zamanı Qazandaşçayda su daşmasının qarşısını almaq üçün dərinləşdirmə və genişləndirmə işləri görülür. İndiyədək burada 1200 metr məsafədə dərinləşdirmə və genişləndirmə işləri aparılıb.
Astara rayonunun 1350 hektar əkin sahəsini suvarma suyu ilə təmin edən su tutumu 6,3 milyon kubmetr olan Lovayın su anbarı tam həcmdə su ilə doldurulub, 4 aqreqatlı Lovayın nasos stansiyasında, o cümlədən mexaniki və elektrik avadanlıqlarda sazlama işləri görülüb. Hazırda Lovayın nasos stansiyası tam gücü ilə işləyir.
Bu il rayonda 6 kilometr qapalı şəbəkədə, 3 kilometr beton kanalda və hidrotexniki qurğularda təmir-bərpa işlərinin görülməsi, suvarma mövsümündə Astaraçaydan 6908 min, Pensərçaydan 2027 min, Lovayın su anbarında 6000 min, Xanbulan su anbarından 7319 min kubmetr su götürülməsi nəzərdə tutulub. İndiyə qədər Astaraçaydan 2290 min, Pensərçaydan 5910 min, Lovayın su anbarından 1613 min, Xanbulan su anbarından 2221 min metrkub su götürülüb.
Rayonda fermerlərin və məhsul istehsalçılarının su ilə təmin edilməsi qrafik və növbəlilik prinsipinə ciddi riayət olunmaqla həyata keçirilir.
Bölmənin digər xəbərləri
