MƏDƏNİYYƏT
Astarada gənclər üçün turizm sahəsində məlumatlandırma sessiyası keçirilmişdir
Astara, 11 aprel (AZƏRTAC, Bağır Əliyev). Aprelin 11-də Astara Rayon Mərkəzi Kitabxanasında “Şəfəq” Ekoturizm İctimai Birliyinin (İB) təşkilatçılığı və Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə reallaşan “Region gənclərinin turizm sahəsində bacarıqlarının artırılmasına dəstək” layihəsi çərçivəsində məlumatlandırma sessiyası keçirilmişdir.
AZƏRTAC xəbər verir ki, sessiyada “Şəfəq” Ekoturizm İctimai Birliyinin sədri Vamiq Babayev, rayon icra hakimiyyətinin baş məsləhətçisi Mirzə Bayramov, İB-nin departament rəhbəri Almara Abbaslı, rayon mədəniyyət və turizm şöbəsinin əməkdaşı Əfqan Şəfiyev, gənclər və idman idarəsinin rəis müavini İqrar Cəfərov, rayon mərkəzi kitabxanasının direktoru Nazim Fərəməzov mövzu ilə bağlı çıxış etmiş, layihəyə dair rəy və təkliflərini bildirmişlər.
Məlumatlandırma sessiyasında fərqlənən və ərizələr əsasında seçim yolu ilə müəyyən ediləcək 17-35 yaş arasında olan gənclər mayın 16-dan 19-dək Masallı rayonunda keçiriləcək “Bələdçi xidməti sahəsində peşəkar gənclərin hazırlığı” təlim-təcrübə proqramında iştirak edəcəklər.
Tədbirin sonunda sessiya iştirakçılarına layihə ilə bağlı hazırlanmış bukletlər paylanılmışdır.