Astaranın çay plantasiyalarında mövsümün ilk yığımına start verilib FOTO VİDEO
Astara, 13 may, İlkin Adıyev, AZƏRTAC
Astaranın çay plantasiyalarında mövsümün ilk çay yığımına start verilib. Mayın ilk günlərində müşahidə edilən yağıntılı hava şəraiti yaşıl çayın yığım prosesini gecikdirsə də, bu yağışlar, eyni zamanda, torpağın rütubət balansını artırıb ki, bu da çay kollarının məhsuldarlığına səbəb olub. Mütəxəssislərin proqnozlarına əsasən, bu mövsümdə sahələrdən bol və keyfiyyətli məhsul əldə olunacaq.
AZƏRTAC-ın bölgə müxbiri xəbər verir ki, çay plantasiyalarında bütün zəruri aqrotexniki tədbirlər görülüb. Torpağın becərilməsi, çay kollarının budanması, alaq otlarının təmizlənməsi, zərərvericilərə və xəstəliklərə qarşı profilaktik tədbirlərin görülməsi bu prosesin əsas mərhələlərini təşkil edib. Eyni zamanda, yağıntılı hava şəraitinin məhsuldarlığa müsbət təsirini maksimum dəyərləndirmək üçün torpaq-nəmlik balansı da daim nəzarətdə saxlanılıb.
"Bu il may ayında yağışlar çox oldu, yığım bir qədər gecikdi. Amma torpaq suya doydu, çay kolları da yaxşı inkişaf etdi. Vaxtında görülən aqrotexniki tədbirlər – budama, gübrələmə, alaq təmizliyi və zərərvericilərə qarşı mübarizə bu il məhsulun keyfiyyətinə müsbət təsir etdi. Əgər hər şey yolunda getsə, bu il yığımdan sonra məhsulu emala göndərəcəyik, inşallah, həm yerli bazar, həm də ixrac üçün keyfiyyətli çay hazırlayacağıq”, – deyə Astaranın təcrübəli çayçılarından olan Firdovsi Abbasov bildirir.
O qeyd edir ki, çayı əllə yığırlar. Əl yığımı həm keyfiyyətli olur, həm də kolun budaqlarına zərər vermir: “Təmiz iş olanda, nəticəsi də yaxşı olur. Bu il məhsulun bol olacağına ümidimiz böyükdür. Neçə illərdi bu sahədə işləyirik, təcrübəmizə güvənirik”.
Ötən il Astaranın çay plantasiyalarından 667 tona yaxın yüksəkkeyfiyyətli yaşıl çay yarpağı yığılıb. Bu il isə fermerlər qarşıya daha böyük hədəf qoyublar. Sahələrdə aparılan müşahidələr və yığım prosesinin ilkin nəticələri onu deməyə əsas verir ki, builki məhsul ötən ildəkindən də bol olacaq.
Mütəxəssislərin sözlərinə görə, may ayında yığılan yaşıl çay yarpaqları il ərzində əldə olunan yarpaqlar arasında ən keyfiyyətlisidir. Çünki bitki vegetasiya dövrünün başlanğıc mərhələsində olur, həm də ilk yarpaqlar daha gənc, yumşaq və aromatik xüsusiyyətlərə malikdir. Həmçinin bu dövrdə yığılan çay daha yüksək antioksidant tərkib və zəngin dad keyfiyyəti ilə fərqlənir.
"May ayı bizim üçün sadəcə mövsümün başlanğıcı deyil, həm də çayçılığın ən gözəl dövrüdür" , – deyə Astaranın tanınmış fermerlərindən olan Validə Abbasova bildirir. Onun illərin təcrübəsi ilə söylədiyi sözlərdən aydın hiss olunur ki, çayçılıq bu bölgədə sadəcə bir təsərrüfat sahəsi deyil, həm də həyat tərzidir.
Deyir ki, mayda yığılan çayın dadı bir başqa olur. Bu ayda yığılan yarpaqlar həm təravətli, həm də yumuşaqlığı ilə seçilir: “Rəngi bir başqa parlayır, dadı isə elə incə olur ki, insan içəndə fərqini dərhal hiss edir. Biz bu məhsulu əllə yığırıq, çünki hər yarpağı dərmək olmaz. Bu, həm zəhmət, həm də sevgi tələb edən işdir”.
O bildirir ki, may ayında yığılan yarpaqlardan hazırlanan yaşıl çay təkcə daxili bazarda deyil, eyni zamanda, xarici ölkələrdə də böyük maraqla qarşılanır: "İllərdir bu işin içindəyəm. Hər dəfə bu dövrdə yığdığımız məhsuldan hazırlanan çay daha tez satılır, çünki insanlar bilirlər ki, bu çayın qoxusu, dadı fərqlidir. Xaricdən gələn sifarişlərdə də xüsusilə may məhsuluna üstünlük verilir".
Hazırda çay plantasiyalarında əllə yığım prosesi sürətlə davam edir. Kifayət qədər təcrübəli olan çaydərən xanımlar məhsulun itkisiz və keyfiyyətlə toplanılmasına xüsusi diqqət yetirirlər.
Bölmənin digər xəbərləri
