ATƏT-İN XÜSUSI NÜMAYƏNDƏSİ AZƏRBAYCANA SƏFƏRƏ GƏLMİŞDİR
MİLLİ MƏCLİSDƏ GÖRÜŞ
Qonaqları səmimi salamlayan parlamentin sədri bu səfərin məlum münaqişənin həllinə təkan verəcəyinə ümidvar olduğunu bildirmişdir.
Murtuz Ələsgərov daha sonra demişdir ki, Azərbaycan bütün beynəlxalq təşkilatlar, o cümlədən ATƏT-in Parlament Assambleyası ilə sıx əməkdaşlıq edir. Onun komitələrinin və ayrı–ayrı qurumlarının iclaslarında, təşkilatın sessiylarında mütəmadi iştirak edir. Yarandığı gündən fəaliyyətini dövlətlərin ərazi bütövlüyü, suverenliyi və sərhədlərin toxunalmazlığı prinsipinə əsasən quran ATƏT Ermənistan-Azərbaycan, Dağlıq Qarabağ münaqişəsinin həllində də məsuliyyəti öz üzərinə götürmüşdür. Ona görə də Azərbaycan bu təşkilatla əməkdaşlığa xüsusi əhəmiyyət verir. Ümid edirik ki, ATƏT özü də məsələnin məsuliyyətini dərk edib, nəhayət, işində dönüş yaradacaqdır.
Sovetlər Birliyi dövründə 250 mindən çox azərbaycanlının Ermənistandan deportasiya olunduğunu, Azərbaycan müstəqilliyini əldə etdikdən sonra sovet qoşunlarını öz ərazilərindən çıxartdığını diqqətə çatdıran Milli Məclisin sədri xatırlatmışdır ki, Ermənistan isə başqa yol seçdi və öz ərazilərindəki xarici qoşunların hesabına Dağlıq Qarabağ və ətrafdakı 7 rayon da daxil olmaqla Azərbaycanın 20 faiz torpağını işğal etdi. Bir milyondan çox insan doğma yurd-yuvalarından qovuldu. İndi erməni separatçıları işğal olunmuş həmin ərazilərdə narkotik maddələr yetişdirir, əldə olunmuş gəlirlər hesabına silah-sursat alınır, terrorçu dəstələr yaradır. Bu faktlar bir sıra mötəbər qurumların hesabatlarında da öz əksini tapmışdır. Ermənistan BMT Təhlükəsizlik Şurasının qəbul etdiyi 4 qətnaməyə və ATƏT-in Lissabon sammitinin qərarlarına məhəl qoymur, bəzi dövlətlər, beynəlxalq təşkilatlar isə ikili standartlarından əl çəkmir. Avropa Şurası Ermənistanın təcavüzkar dövlət olduğunu təsdiq edib, Avropa Birliyi də dolayısı ilə bu faktı təsdiqləyir, amma məsələ ilə birbaşa məşğul olan ATƏT isə hələ də susur.
Azərbaycanın regionda sabitliyin dayağı olduğunu söyləyən Murtuz Ələsgərov demişdir ki, bununla belə, biz münaqişənin sülh yolu, beynəlxalq hüquq normalarına uyğun, dövlətlərin ərazi bütövlüyü çərçivəsində həllinə ümid bəsləyirik. Azərbaycan sülh istəyir, amma tezliklə buna nail olunmasa, öz pozulmuş hüquqlarını başqa vasitələrlə bərpa edəcəkdir.
Ətraflı məlumat üçün minnətdarlıq edən Qoran Lenmarker bildirmişdir ki, uzun sürən münaqişələrin tezliklə və sülh yolu ilə həllinə nail olmaq çətindir.
Ancaq Azərbaycanın münaqişəni sülh yolu ilə həll etmək niyyəti təqdirəlayiqdir.
Qonaq vurğulamışdır ki, Cənubi Qafqaza səfərdən məqsəd münaqişə ilə bağlı tərəflərin mövqeyini, ictimaiyyətin fikrini öyrənmək və çıxış yolu axtarmaqdır. Beynəlxalq hüquqda dövlətlərin ərazi bütövlüyü, sərhədlərin toxunulmazlıq prinsipi var, amma xalqların öz müqəddəratını təyin etmək prinsipi də unudulmamalıdır. Biz Azərbaycanda ətraflı, geniş söhbətlər aparacaq, qaçqınların problemi ilə maraqlanacaq və sonra Yerevana gedəcəyik.
Bununla əlaqədar Murtuz Ələsgərov demişdir ki, ermənilər bir dəfə öz müqəddəratlarını təyin ediblər, Azərbaycan torpaqları hesabına Ermənistan dövləti yaradıblar. İndi harada 10 və 100 min erməni yaşayırsa, orada da dövlət yaratmaq istəyirlər.
Söhbət zamanı qarşılıqlı maraq doğuran digər məsələlər ətrafında da fikir mübadiləsi aparılmışdır.
Görüşdə Milli Məclisin iqtisadi siyasət daimi komissiyasının sədri Səttar Səfərov, aqrar siyasət daimi komissiyasının sədri Eldar İbrahimov, Aparatın Beynəlxalq münasibətlər şöbəsinin müdiri Azər Qasımov, parlamentin AŞPA-dakı nümayəndə heyətinin üzvləri iştirak etmişlər.
Bölmənin digər xəbərləri
