ATU-nun əcnəbi tələbələri Gəncə Memorial Kompleksini ziyarət ediblər
Gəncə, 1 oktyabr, Elcan Məmmədov, AZƏRTAC
Azərbaycan Texnologiya Universitetində (ATU) təhsil alan əcnəbi tələbələr bir neçə gün əvvəl Prezident İlham Əliyevin iştirakı ilə açılışı olan Gəncə Memorial Kompleksini ziyarət ediblər.
Universitetdən AZƏRTAC-ın bölgə müxbirinə verilən məlumata görə, ziyarət zamanı onlar Gəncəyə edilən raket hücumlarının dinc əhaliyə vurduğu ağır nəticələr barədə məlumatlandırılıblar. Bildirilib ki, Gəncə Memorial Kompleksi Ermənistan silahlı qüvvələrinin 2020-ci ilin oktyabrında Gəncə şəhərinə raket hücumları nəticəsində həlak olmuş dinc sakinlərin xatirəsini əbədiləşdirmək məqsədilə inşa edilib.
Əcnəbi tələbələr kompleksi ziyarət edərək, 44 günlük Vətən müharibəsi dövründə cəbhə xəttindən uzaqda yaşayan sakinlərin, körpələrin yaşadığı faciəli hadisələr və itkilər, eləcə də dövlət-xalq-ordu birliyinin gücü barədə məlumat alıblar.
Ekskursiyanın təşkilində məqsəd əcnəbi tələbələrin asudə vaxtının səmərəli təşkilini təmin etmək, onların ölkənin tarixi və mədəni həyatı ilə yaxından tanış olmalarına, Azərbaycan haqqında bilik və təsəvvürlərinin zənginləşməsinə şərait yaratmaqdır.
Qeyd edək ki, hazırda ATU-da Pakistan, Hindistan, Nepal, Banqladeş, Türkiyə, Rusiya, Nigeriya və digər ölkələrdən olan 106 tələbə bakalavr və magistratura səviyyələrində, eləcə də hazırlıq qruplarında təhsil alır.
Bölmənin digər xəbərləri
