Auqsburq şəhərində Almaniyada Azərbaycanlı Tibb İşçiləri Birliyinin yubiley konfransı keçirilib VİDEO
Auqsburq, 1 noyabr, AZƏRTAC
Almaniyanın Auqsburq şəhərində Almaniyada Azərbaycanlı Tibb İşçiləri Birliyinin (AMD) yubiley - beşinci konfransı keçirilib.
AZƏRTAC xəbər verir ki, tədbirdə Almaniyada çalışan 120-dən çox həkim, alim və tibb tələbəsi iştirak edib.
Birliyin İdarə Heyətinin sədri, Singen xəstəxanasının aparıcı həkimi, neyrocərrah Turab Qasımov təşkilatın 5 illik fəaliyyəti haqqında məlumat verib, konfransın işinə uğurlar arzulayıb.
AMD İdarə Heyətinin üzvləri - cərrah Ümüd Səlimzadənin idarəçiliyi və ginekoloq Mina Mustafayevanın aparıcılığı ilə keçirilən konfransda Almaniyada gənc azərbaycanlı həkimlərin səhiyyə sisteminə inteqrasiyası və ixtisasartırması, Almaniya səhiyyə və tibb təhsili sisteminin beynəlxalq kontekstdə müqayisəli təhlili, müqaviləli həkim fəaliyyətinin üstünlükləri və çatışmazlıqları, süni intellektin tibbi diaqnostika, müalicə, proqnoz və tibbi tədrisdə tətbiqi mövzuları müzakirə olunub.
Frankfurtda çalışan anestezioloq, həmçinin AMD İdarə Heyətinin üzvü Leylan Məmmədova Birliyin yaranma tarixi, fəaliyyəti və gələcək planları haqqında təqdimatla çıxış edib.
Sonra Almaniyanın İdar-Oberştayn xəstəxanasının Kardiologiya klinikasının direktoru professor Natiq Həsənov tələbəlik illərindən klinika direktoru vəzifəsinə qədər keçdiyi peşəkar inkişaf yolu barədə təcrübələrini bölüşüb.
Drezdendə çalışan nevroloq Könül Məmmədova müxtəlif ixtisaslarda müqaviləəsaslı fəaliyyətin üstünlükləri və imkanları barədə çıxış edib.
Virtsburqda fəaliyyət göstərən ürək-damar cərrahı Seymur Kərimli isə aorta anevrizmalarının profilaktikası və müalicə üsullarının əhəmiyyəti haqqında təcrübələrini paylaşıb.
Sonra tədbir panel müzakirələri ilə davam edib. Panel müzakirələrində müxtəlif ixtisaslardan olan azərbaycanlı aparıcı həkimlər, eləcə də süni intellekt üzrə ekspertlər çıxış ediblər.
AMD-nin sədr müavini, otorinolarinqoloq Elşən Ağayevin moderatorluq etdiyi birinci panel sessiyası “Tibdə süni intellektin tətbiqi” mövzusuna həsr olunub. Müzakirələr informasiya texnologiyaları və süni intellekt üzrə mütəxəssis Toğrul Məmmədli, klinik tədqiqatlar üzrə mütəxəssis Jalə Ağayeva, radioloq Saidə Dadaşova, oftalmoloq Aqil Hüseynzadə və neyrocərrah Turab Qasımov süni intellektin diaqnostika, müalicə, proqnozlaşdırma, tibbi təhsil və “in silico” klinik tədqiqatlarda istifadəsinə dair müzakirələr aparıblar. Eyni zamanda, süni intellektin üstünlükləri və məhdudiyyətləri, gələcəkdə avtomatlaşdırmanın artması, həmçinin bəzi tibbi vəzifələrin ixtisarı ilə bağlı narahatlıqlar da ifadə olunub.
“Beynəlxalq müqayisədə tibb elmləri, mütəxəssis hazırlığı və doktorantura: İmkanlar və perspektivlər” mövzusunda ikinci panel sessiyasına Birliyin sədri Turab Qasımov moderatorluq edib. Müzakirələrdə professor Natiq Həsənov, həkimlər Vüqar Yaqublu, Rəhim Şmidt, Müşviqə Həsənova və Seymur Kərimli çıxış ediblər. Panel sessiyasında Almaniyada tibb, rezidentura və doktorantura təhsili barədə fikir mübadiləsi aparılıb, Almaniya təhsil sisteminin imkanları, üstünlükləri və çətinlikləri təhlil edilib. Çıxış edənlər, həmçinin müxtəlif ölkələrdəki peşəkar inkişaf yolları haqqında təcrübələrini bölüşüb və gənc həkimlərə faydalı tövsiyələr veriblər.
Konfrans rəsmi hissədən sonra qala yeməyi və musiqili proqramla davam edib. Tədbir çərçivəsində, həmçinin AMD üzvlərinin illik ümumi yığıncağı da keçirilib.
Qeyd edək ki, AMD Almaniyada azərbaycanlı həkimləri bir araya gətirən ilk təşkilat hesab olunur. Bu gün təşkilatın həm Almaniyada, həm də xaricdə fəaliyyət göstərən xeyli sayda üzv və fəxri üzvü var. Təşkilatın əsas məqsədlərindən biri Almaniyada fəaliyyət göstərən azərbaycanlı tibb tələbələrinin peşəkar fəaliyyətə uyğunlaşmasına dəstək göstərməkdir. Son illərdə AMD platforması çoxsaylı gənc mütəxəssisə təcrübə keçmək, iş tapmaq, ixtisaslaşma və elmi dərəcə qazanmaq imkanları yaradıb. Beləliklə, təşkilat səhiyyə sistemi və tibb təhsilinə mühüm töhfə verir və ixtisaslı həkim çatışmazlığının aradan qaldırılması istiqamətində könüllü əsaslarla mühüm fəaliyyət göstərir. Təşkilat, həmçinin həmvətənlilərimizin Almaniyada ailəlikcə bir araya gəlməsinə, onların vaxtlarını səmərəli keçirməyə və şəbəkələşməyə də dəstək verir.
Elvin Mövsüm
AZƏRTAC-ın xüsusi müxbiri
Auqsburq
Bölmənin digər xəbərləri
