AVROPA CÜDO FEDERASİYASI AZƏRBAYCANDA SEMİNAR KEÇİRİR
Seminara 38 ölkənin – Bolqarıstan, Türkiyə, İngiltərə, Ukrayna, Almaniya, İsveçrə, Portuqaliya, Avstriya və digər ölkələrin nümayəndələri gəlmişlər. Tədbirdə ölkəmizi beynəlxalq dərəcəli hakimlər Zair Məmmədov və Valeh Məhərrəmov təmsil edirlər.
Seminar başlanmazdan əvvəl qonaqlar Fəxri xiyabanı ziyarət edərək, ümummilli liderimiz, müstəqil Azərbaycan dövlətinin qurucusu Heydər Əliyevin xatirəsini anmış, onun məzarı önünə əklil qoymuşlar. Onlar Zərifə xanım Əliyevanın da məzarı üzərinə tər güllər düzmüşlər.
Sonra qonaqlar Şəhidlər xiyabanına gedərək, vətənimizin suverenliyi və ərazi bütövlüyü uğrunda canlarından keçmiş qəhrəman oğul və qızlarımızın xatirəsini yad etmişlər.
Gənclər, idman və turizm naziri Əbülfəz Qarayev seminarda çıxış edərək, belə mötəbər tədbirin Bakıda keçirilməsi təşəbbüsünə görə beynəlxalq və Avropa cüdo federasiyalarının rəhbərliyinə minnətdarlığını bildirmişdir. Nazir ölkəmizdə idman hərəkatının inkişafından danışaraq demişdir ki, Azərbaycan son illər bu sahədə gözəçarpacaq nəticələr əldə etmişdir. Təsadüfi deyil ki, təkcə bu ilin altı ayı ərzində ölkəmizdə altı beynəlxalq yarış keçirilmişdir ki, onların da üçü Olimpiya lisenziya turniridir. Azərbaycanı belə mötəbər yarışların keçirilməsi üçün seçərkən beynəlxalq federasiyalar, şübhəsiz, ölkəmizin iqtisadiyyatda, demokratiyanın inkişafında qazandığı uğurları nəzərə almışlar.
Üç gün davam edəcək seminarda hakimlər bu və ya digər mübahisəli döyüş anlarına xüsusi diqqət yetirəcək, qaydaların ümumi şərhini verəcəklər. Seminara Beynəlxalq Cüdo Federasiyası Hakimlər Komitəsinin başçısı Xuan Barkos rəhbərlik edir.
