Avropa dövlətləri nəyə görə katalonların, korsikalıların hüquqlarını müdafiə etmir? - TƏHLİL
Bakı, 27 yanvar, Rabil Kətanov, AZƏRTAC
Qərbin xalqların milli xüsusiyyətlərini və dövlətlərin maraqlarını nəzərə almayaraq demokratiya, insan hüquq və azadlıqları üzərindən tətbiq etməyə çalışdığı “yeni dünya düzəni” yalnız mənfi məqamlardan ibarət olduğunu açıq-aydın göstərdi. Qərb artıq özünün siyasi nüfuzunu tam olaraq itirmək üzrədir.
“Əl-Cəzirə” saytı yazır ki, demokratiya və insan hüquqlarını rəhbər tutaraq dünyanın müxtəlif regionlarına müdaxilə edən Qərb yalnız öz maraqlarına xidmət göstərir. Qərbin zorakılığı və hərbi müdaxiləsi minlərlə insanın həlak olması ilə nəticələnsə də, günahkar müdaxiləyə məruz qalan tərəf çıxır və onlar buna görə heç bir məsuliyyət daşımırlar.
İraq, Suriya, Liviya, Əfqanıstan, Tunis, Asiya və digər ölkələrdə baş verən qanlı hadisələr, inqilablar, zorla həyata keçirilən dövlət çevrilişləri Qərbin beynəlxalq hüquqa heç zaman məhəl qoymadığını göstərdi. Qərb dövlətlərinin ikiüzlülüyü və ikili standartlar siyasəti onu deməyə əsas verir ki, yeni dünya düzəni Avropanın və ABŞ-ın maraqlarının qorunmasına xidmət edəcək. Digər xalqların və milli dövlətlərin hansı vəziyyətə düşəcəyi Qərb üçün qətiyyən maraqlı deyil. Yaxın Şərqdə, Asiyada və Afrikada Qərb dövlətlərinin insanlıq əleyhinə törətdikləri cinayətlərdən danışanlar dərhal insan hüquqlarını pozan, demokratiya əleyhinə çıxış edən diktator elan olunur. Artıq dünya ictimaiyyəti Qərbə və onun irəli sürdüyü dəyərlərə etibar etmir.
Yaponiyanın Osaka Universitetinin professoru Sol Cey Takahaşı yazır ki, Qərb bütün dünyanı Rusiyanın əleyhinə silahlandırmağa çalışır və bəzi kiçik dövlətləri öz milli maraqlarına zidd siyasi addımlar atmaq məcburiyyətində qoyur. Beynəlxalq münasibətlər sistemini, beynəlxalq hüquq və normalar yalnız Qərbin maraqlarının müdafiəçisi qismində çıxış edir. Yaxın Şərq, Asiya və Afrikada baş verən silahlı münaqişələrin arxasında Qərbin dayandığı artıq heç kim üçün sirr deyil.
İnsan hüquqlarını araşdıran professorun sözlərinə görə, Avropanın və ABŞ-ın mövqeyi ondan ibarətdir ki, qayda və qanunları təkcə qarşı tərəf gözləməlidir, onların özləri üçün isə heç bir qanun yoxdur.
Çinə qarşı münasibət də Qərbin ikiüzlü siyasətini aşkara çıxarır. Çinin dörd tərəfində ABŞ-ın hərbi bazaları fəaliyyət göstərir. Buna baxmayaraq, Qərb mətbuatı həmişə Çini günahkar çıxarır, onu insan hüquqlarını pozmaqda ittiham edir.
Beynəlxalq qaydalar ancaq Qərbin özünə xidmət edir, yəni, özlərinə aid olan məsələlərdə bu qanunlar işə düşür. Lakin dünyanın qalan hissəsi Qərb tərəfindən “sivilizasiya” sayılmır və onlarda belə bir təəssürat var ki, buralarda nə istəsələr edə bilərlər. Bu məntiqlə siyasət yürüdən Qərb tarix boyu xalqları əsarətdə saxlayıb, onların təbii sərvətlərini talayıb.
Birinci Dünya müharibəsindən sonra ABŞ Prezidenti Vudro Vilson təkidlə bildirirdi ki, xalqların öz müqəddəratını təyin etmək hüququ tanınmalıdır və bu, Millətlər Cəmiyyətinin Nizamnaməsində əks olunmalıdır. Eyni məsələ BMT-nin də Nizamnaməsində öz əksini tapıb. Lakin ABŞ-da Texas, Fransada Korsika, İspaniyada Kataloniya və başqa yerlərdə yaşayan azsaylı xalqların bu hüququ tanınmadı. Qərb özünə rəva bilmədiyini başqalarına məsləhət görür. Bununla belə, bu gün Avropa Qarabağ ermənilərinin hüquqlarının müdafiəçisi kimi çıxış edir. Avropa dövlətləri nəyə görə katalonların, korsikalıların hüquqlarını müdafiə etmir? Kataloniyanın mərkəzi hökumət tərəfindən talandığını deyən muxtar qurumun rəhbəri Karles Puçdemon İspaniyadan qaçdı və heç bir Avropa dövləti onu müdafiə etmədi. İkili standartlar siyasəti Avropa tərəfindən təsadüfən həyata keçirilmir. Məqsəd ənənəvi siyasəti davam etdirmək, yeni koloniyalar ələ keçirmək, insan hüquqları və demokratiya bəhanələri ilə milli dövlətləri əsarət altına salmaq, onların təbii sərvətlərini talamaqdan ibarətdir.
Bölmənin digər xəbərləri
