Avropa İttifaqında avtomobil satışları oktyabrda 5,8 faiz artıb

25.11.2025 [14:32]
Çap et
A⁺ A^-

Bakı, 25 noyabr, AZƏRTAC

Oktyabrda Avropa İttifaqında (Aİ) avtomobil satışları illik müqayisədə 5,8 faiz artıb.

AZƏRTAC xəbər verir ki, bu barədə Avropa Avtomobil İstehsalçıları Assosiasiyasının (ACEA) məlumatında deyilir. Məlumata görə, Aİ ölkələrində qeydiyyata alınan yeni minik avtomobillərinin sayı 2024-cü ilin oktyabrındakı 866,1 min ədəddən 916,6 min ədədə çatıb. İspaniyada satışlar 15,9 faiz, Almaniyada 7,8 faiz, Fransada 2,9 faiz artıb, İtaliyada isə 0,5 faiz azalıb.

Bütövlükdə Avropada (Aİ ölkələri üstəgəl İslandiya, Norveç, İsveçrə və Böyük Britaniya) satılan yeni avtomobillərin sayı keçən ay 4,9 faiz artaraq 1,09 milyonu ötüb. Eyni zamanda, Avropa İttifaqında elektrik avtomobil satışları 38,6 faiz artaraq 173 min 170 ədəd təşkil edib.

“Volkswagen” Aİ-də satışları 7,9 faiz, “Stellantis” 6,6 faiz, “Renault” 10 faiz, alman lüks avtomobil istehsalçısı “BMW AG” 8,7 faiz, onun əsas rəqibi olan “Mercedes-Benz” 2 faiz artırıb.

Yaponiyanın “Toyota” qrupunun satışlarında isə əksinə, 10,8 faiz, ABŞ-ın “Ford Motor” şirkətinin satışlarında 8,8 faiz azalma olub.

“Tesla” oktyabrda Aİ-də cəmi 5650 avtomobil satıb ki, bu da illik müqayisədə 48 faiz azdır. Çinin “BYD Co.” kompaniyasının satışları təxminən üç dəfə artaraq 13 min 350 avtomobilə çatıb.

Yanvar-oktyabr aylarında Aİ-də avtomobil satışı ümumilikdə 1,4 faiz artaraq 8,974 milyon ədəd təşkil edib.