Avropa Komissiyasının əməkdaşları iş yükünün artmasından narazıdırlar
Brüssel, 25 noyabr, AZƏRTAC
Avropa Komissiyasının əməkdaşları iş yükünün artmasından narazı qaldıqlarını bildirərək daha qısa iş həftəsi, xaricdən daha çox distant iş imkanı səviyyəsinə çatan tükənmişliyə qarşı əlavə müdafiə tələb edirlər. Bu tələb Komissiyanın daxili iş rejiminin yenidən baxılması çərçivəsində gündəmə gəlib.
Hibrid formatda keçirilən ümumi görüşdə ən çox verilən sual iş saatlarının 40-dan aşağı salınıb-salınmayacağı ilə bağlı olub. Lakin İctimai Administrasiya üzrə komissar Piotr Serafin bu gözləntilərin real olmadığını bildirib. O qeyd edib ki, yeni büdcə danışıqları fonunda üzv dövlətlər daha böyük idarəetmə aparatının maliyyələşdirilməsinə hazır deyillər.
Serafin Komissiyanın yeni büdcə paketində 2500 əlavə əməkdaş üçün vəsait istədiyini, lakin demək olar ki, bütün hökumətlərin bu təklifi tənqid etdiyini söyləyib. Görüşdə iştirakçılar iş şəraitinə dair sərt suallar ünvanlayıblar. Slido platformasında bir əməkdaş “bəzi xidmətlərdə daimi həddən artıq yüklənmə” olduğunu yazaraq onlarla dəstək alıb. Tükənmişlik hallarının artdığı da vurğulanıb.
Xaricdən ildə ən azı 30 gün distant iş təklifi isə Serafin tərəfindən rədd edilib. O bildirib ki, hazırkı 10 günlük imkan kifayətdir.
Yenidən baxış prosesinə 100-dən çox ekspert cəlb olunub və yekun təkliflərin 2026-cı ilin sonunda təqdim ediləcəyi gözlənilir.
Vüqar Seyidov
AZƏRTAC-ın xüsusi müxbiri
Brüssel
Bölmənin digər xəbərləri
